Kur do të shpallet tenderi për spitalin e Shtipit?

Shpallja e një tenderi të ri – shpresë e re për pacientët nga lindja. A do të realizohen premtimet, kësaj radhe të ministrit të ri të Shëndetësisë, se qytetarët do ta kenë spitalin e ri të shumëpritur në Shtip, i cili ka gati një dekadë në ndërtim dhe ende nuk ka funksionuar dhe që ka rëndësi jetike për 200,000 pacientë nga dy rajone, përcjell FLAKA.

Kur do të shpallet tenderi i ri për përfundimin e spitalit të ri në Shtip dhe sa do të kushtojë? Si do të paguhet, pra a do të ketë nevojë për kredi të reja? Çfarë do të parashikojë tenderi i ri për përfundimin e spitalit në Shtip dhe kur mund të presim vazhdimin e aktiviteteve ndërtimore? Këto janë pyetjet për të cilat 24 kërkuan përgjigje nga ministria e linjës. Mirëpo, nga atje thonë se për momentin nuk ka asgjë të re dhe i referohen deklaratës së fundit të ministrit Taravari në Shtip, kur tha se shumë shpejt do të shpallet procedura dhe mund të rifillojnë punët ndërtimore në spital.

Dhe çfarë thonë qytetarët për këtë temë? Disa janë optimistë me besim se një ditë do të mund të trajtohen në kushte moderne, ndërsa disa janë skeptikë kur është fjala për spitalin e ri në Shtip.

Ndryshe, spitali i Shtipit ka tetë vjet që është në ndërtim e sipër dhe ende nuk është ndërtuar plotësisht. Përfaqësuesit politikë çdo vit premtojnë ta përfundojnë, por qytetarët nuk marrin asnjëherë ambiente të reja spitalore moderne. Nëse kjo herë do të jetë ndryshe, mbetet për t’u parë. FLAKA