Ze Roberto nuk e pëlqen Pep Guardiolën, kërkon Abel Ferreira-n

Eliminimi i Brazilit ndaj Uruguajit në çerekfinalen e Kupës së Amerikës bëri një zhurmë të jashtëzakonshme. Edhe një herë zila e alarmit ra në shtëpinë e “Seleção”, e cila megjithatë, përmes presidentit Ednaldo Rodrigues i garantoi Dorival Junior vendin në stolin e pesë herë kampionëve të botës.

Një lajm i padëshiruar për mjaft tifozë brazilianë dhe ish-lojtarë, që e kanë veshur këtë fanellë shumë të rëndë. Ashtu si Zé Roberto, i cili ka bërë 84 paraqitje me Brazilin, i cili gjatë një interviste të dhënë për “ESPN Brasil” theksoi se Brazili ka mbetur prapa në aspektin e trajnerëve.

“Brazili ka mbetur pak mbrapa kur bëhet fjalë për trajnimin e trajnerëve. Ne kemi pak trajnerë kompetentë që kujdesen për futbollin. Rrjedhimisht edhe kombëtarja ka pak opsione”.

I pyetur nëse “Seleção” mund të kishte ndonjëherë një trajner si Guardiola, 50-vjeçari me origjinë nga São Paulo, ish-mesfushori i Real Madridit dhe Flamengos, u përgjigj shpejtë.

 “Unë mendoj se po. Nëse sot do të preferohej një i huaj, personalisht do të zgjidhja Abel Ferreira”.

Nuk vonon përforcimi i idesë së trajnerit portugez si zgjidhja ideale për të marrë në dorëzim kombëtaren braziliane.

“Abel Ferreira është një trajner, që ka disa vite në Brazil. Një trajner që di të sillet me lojtarët, emër i shkëlqyer për kombëtaren braziliane”.