Situata kaotike në Shëngjin! Zjarri po afrohet afër bizneseve dhe banesave

Situatë kritike nga zjarret në Shëngjin, në Shqipëri. Zjarret kanë kapluar fshatin Mal në Shëngjin, teksa vazhdojnë të jenë ende aktive që në fundjavë. Për shkak të erës, vatrat janë përhapur edhe më tej, pranë banesave dhe hoteleve, duke e bërë e pamundur izolimin e tyre. Sipas autoriteteve, banorët e zonës janë evakuuar.

“T’ju nxis që të vazhdoni me këtë intensitet për ta përmbyllur me sukses këtë përballje, me këtë situatë tepër të vështirë, e cila vazhdon. Kështu që, na duhet të mirë administrojmë forcat sepse e vërteta është që kemi edhe plot zjarre të tjera në zona të caktuara. Kemi sjell këtu forca nga Berati, Fieri, natyrshëm Tirana, Kamza, apo bashkitë fqinje me bashkinë Lezhë”, u shpreh Taulant Balla, Ministër i Brendshëm.

Gjithashtu në Vlorë, Elbasan, Gjirokastër janë paraqitur vatra zjarri. Në Vlorë u vendos situata e zjarrit nën kontroll pas ndërhyrjes së ushtrisë. Teksa në Elbasan, situata mbetet e rrezikshme, edhe pas ndërhyrjes së 40 forcave të zjarrfikëseve dhe efektivëve të ushtrisë. Ndërkohë, në Gjirokastër, më shumë se 180 forca dhe vullnetarë janë duke luftuar me flakët, për izolimin e tyre. Në Durrës, një person është prangosur pasi u bë shkak për përhapjen e flakëve në zonën e Shkëmbit të Kavajës, ku u rrezikuan banesat përreth dhe u dogj një sipërfaqe toke. Në 24 orët e fundit, në vend janë angazhuar në operacionet e shuarjes së zjarreve 519 forca operacionale, 45 mjete zjarrfikëse dhe një helikopter i forcave të armatosura. /Alsat.mk