Mickoski: Jemi të gatshëm të bisedojmë, vendi dëshiron të bisedojë, por duhet garanci

Qeveria gjatë seancës me dyer të mbyllura ka bërë ndryshim në përbërjen kadrovike të Komisionit negociues maqedono-bullgar për çështje historike dhe arsimore. Ndonëse në opinion dolën emrat e historianëve që do të jenë pjesë e Komisionit që do të drejtohet nga profesori, Vanço Gjorgjiev, kreu i Qeverisë, Hristijan Mickoski, nuk i konfirmoi emrat, sepse sipas tij, është informacion i klasifikuar. Komisioni i udhëhequr nga Dragi Georgiev nga pala maqedonase, sipas Mickoskit, nuk i ka mbrojtur interesat kombëtare të popullit maqedonas.

“Kemi ndryshime në komisionin negociues për faktet historike nga ana jonë, nuk mund t’i përmendi emrat pasi megjithatë ishte në një seancë me dyer të mbyllura. Kur ky informacion të jetë i deklasifikuar, publiku do të jete i njoftuar për emrat e anëtarëve.”, – deklaroi kryeministri, Hristijan Mickoski.

Kryeministri Mickoski tani është në pritje të formimit të Qeverisë politike në Sofje për të parë nëse ka dëshirë për dialog atje. Sipas tij, qëndrimet e Maqedonisë janë të qarta dhe se vendi dëshiron të bisedojë, por duhet të marrë garanci të qarta. Mickoski tashmë ka paralajmëruar se më 19 shtator në Bruksel do të prezantojë propozimin e Qeverisë për procesin e integrimit evropian të Maqedonisë.

“Tani është një periudhë kur absolutisht asgjë nuk mund të ndodhë në atë proces, sepse siç e dini kemi një periudhë kur në Bullgari do të ketë zgjedhje të reja të parakohshme parlamentare të shtatat me radhë, në tre vitet e fundit. Të presim që atje të bëhet një Qeveri politike, që të shohim nëse ka dëshirë për dialog. Ne jemi të gatshëm të bisedojmë, duam të bisedojmë dhe këtë ua përcjellim bashkëbiseduesve tanë, që vijnë nga Brukseli. Ndryshe, sa i përket propozimeve tona, ato në opinion janë komentuar shumë herë deri më tani.”, – theksoi kryeministri, Hristijan Mickoski.

Filipçe: Qeveria s’ka qëllime të sinqerta eurointegruese

Por, lideri i opozitës maqedonase, Venko Filipçe, nuk sheh qëllime të sinqerta te Qeveria e vendit për të hapëruar drejt eurointegrimeve.

“Nuk shohim asnjë hap, me të cilin sigurohet përparimi i ardhshëm i vendit në kuadër të procesit eurointegrues. Në atë kuptim, ne jemi plotësisht të përkushtuar si parti në përparimin e shtetit dhe mundemi dhe dëshirojmë të bisedojmë me secilin që ka qëllime të sinqerta dhe i cili ka punë të vërtetë. Nuk besojmë në këtë moment dhe nuk shohim se VMRO-DPMNE-ja ka qëllime të sinqerta në ofertën për bashkëpunim.”, – u shpreh kryetari i LSDM-së, Venko Filipçe.

Nga LSDM-ja, ofertën për bashkëpunim nga VMRO-DPMNE-ja e vlerësojnë si tendencë për të siguruar partner për interesat e ngushta partiake apo personale.