U mbajt peng 7 vjet gjatë luftës civile në Liban, ndërron jetë gazetari i njohur amerikan

Gazetari i njohur amerikan, Terry Anderson, i cili u mbajt peng për gati 7 vjet gjatë luftës civile në Liban, ka ndërruar jetë në moshën 76-vjeçare.

Anderson ishte korrespondenti kryesor për Lindjen e Mesme për “Associated Press” kur u kap nga militantët islamikë në vitin 1985 gjatë asaj që u bë e njohur si kriza e pengjeve në Liban, shkruan BBC.

Vajza e tij është shprehur se Anderson vdiq në shtëpinë e tij në Greenwood Lake, Nju Jork, të dielën.

“Asnjëherë nuk i pëlqente të quhej hero, diçka që të gjithë këmbëngulën ta quanin”, tha ajo.

“Megjithëse jeta e babait tim u karakterizua nga vuajtje ekstreme gjatë kohës së tij si peng në robëri, ai gjeti një paqe të qetë dhe të rehatshme vitet e fundit”, ka thënë e bija e të ndjerit.

Anderson u rrëmbye në Bejrut më 16 mars 1985. Ai sapo kishte mbaruar së luajturi tenis kur persona të armatosur e tërhoqën zvarrë në një makinë dhe u larguan me shpejtësi.

76-vjeçari u lirua përfundimisht në 1991 pasi lufta civile përfundoi.