Dikush kërkon paga më të larta e dikush vota!

Politologu Nikolla Cvetkovski për gazetën KOHA, ka deklaruar se sulmet e ulëta dhe ofendimet në bazë të moshës dhe gjinisë ishin retorikë e rregullt në raundin e parë të garës. Sipas tij, pjesa më e madhe e fushatës së zezë, si gjithmonë, po zhvillohet në sfond

Specialistët privatë do të protestojnë sërish, pasi nuk pranuan kërkesat e tyre për zgjidhje pas zgjedhjeve. Njoftime për protesta të radikalizuara kemi nga punëtorët e “Pyjeve Kombëtare”, “Ekonomia e Ujërave”, “Posta e Maqedonisë”, pikërisht në kohën kur partitë në fushatë premtojnë paga më të larta dhe standarde më të mira.

Dikush kërkon rrogë të papaguar, dikush kërkon rrogë më të madhe dhe të gjithë akuzojnë shtetin se është punëdhënësi më i keq për momentin. Disa greva të vazhdueshme, njoftimet për radikalizimin e pakënaqësisë dhe protesta e përgjithshme e Sindikatës (LSM) më 1 maj është sfida që organizatat sindikaliste i parashtruan qeverisë, në mes të dy fushatave zgjedhore për zgjedhjet presidenciale të mërkurën më 24 prill dhe zgjedhjet parlamentare dhe raundi i dytë i mundshëm i zgjedhjeve presidenciale më 8 maj. Kjo është hera e parë që ka pasur kaq shumë greva dhe protesta gjatë një fushate dhe para një Qeverie që ka vetëm mandat teknik për të zhvilluar zgjedhjet.

Që nga fillimi i fushatës, specialistët privatë të klinikave, punonjësit e institucioneve të kulturës, punonjësit e “Pyjeve të Maqedonisë”, “Ekonomia e Ujërave” dhe punëtorët shëndetësorë janë në grevë ose janë ende në grevë.

Ivan Peshevski, kryetar i Sindikatës për ndërtim, industri dhe projektim paralajmëroi radikalizimin e pakënaqësive, si “Posta e Maqedonisë”, “Parqet dhe Gjelbërimi” dhe “Ekonomia e Ujërave” . LSM tashmë ka paralajmëruar protestë të përgjithshme për 1 majin, ditën e punëtorëve.

Politologu Nikolla Cvetkovski për gazetën KOHA, ka deklaruar se sulmet e ulëta dhe ofendimet në bazë të moshës dhe gjinisë ishin retorikë e rregullt në raundin e parë të garës presidenciale. “Narrativa të dëmshme që mund të cenojnë dinjitetin e këtij grupi qytetarësh. Pjesa më e madhe e fushatës së zezë, si gjithmonë, po zhvillohet në sfond. Nuk e dëgjojmë drejtpërdrejt nga politikanët. E gjithë kjo, siç pritej, u thellua me fillimin e garës, për të cilën pritet një retorikë e nxehtë. Publiku ishte dëshmitar i mungesës së inovacionit në marketingun politik publik, me materiale reklamuese dhe spote politike që nuk ishin aspak mbresëlënëse”, tha Cvetkovski.

Një pjesë e madhe e partive politike, siç tha ai, shpikjen dhe aftësinë e tyre e përqendruan në gjetjen e rrugëve, si të vjedhin para kohe fushatën për zgjedhjet parlamentare, por edhe si të shpifin indirekt kundërshtarin. “Modeli i financimit të partive, i krijuar për të margjinalizuar rrymat radikale politike, e bën të vështirë për këdo tjetër përveç dy opsioneve më të mëdha kalimin e filtrit të parë. Sigurisht që partitë e vogla do t’i përdorin rezultatet e raundit të parë si aset në fushatën parlamentare, por edhe si argument në krijimin e koalicioneve dhe zgjidhjen e dilemave brendapartiake”, u shpreh në fund ai.

ÇFARË DO TË MARRIN PARA ZGJEDHJEVE?

Të pyetur se çfarë presin nga një qeveri që nuk ka mandat për të marrë vendime madhore, organizatat sindikale thonë se problemi është se disa institucione nuk paguajnë as paga, gjë që është pjesë e obligimeve të rregullta mujore. “Nëse nuk paguheni për muajin mars deri më 15 prill, natyrisht që do të kërkoni atë që keni fituar më 16 prill”, thonë punonjësit e kulturës që protestuan javën e kaluar për shkak të papagimit të pagës së marsit. “Bëhet fjalë për institucionet qeveritare. Është e papranueshme që kjo të ndodhë me ne, 15 ditë para zgjedhjeve. Duke kërkuar votën tonë dhe duke mos na paguar siç duhet. Po flasim për rrogën që kemi marrë, jo për ryshfet dhe korrupsion”, tha Sllobodan Trendafilov, kryetar i LSM-së.

Nga ana tjetër, analisti ekonomik, Arben Halili, beson se një Qeveri teknike nuk mund t’i përgjigjet asnjë kërkese në këtë periudhë. “Nuk do të zbulojmë asgjë të re nëse themi se shpesh ka një sfond politik pas protestave të tilla para zgjedhjeve. Nuk e di pse bëhet grevë gjatë fushatës dhe përpara një qeverie teknike, kur asnjë ministër nuk mund të premtojë asgjë. Kushdo që u premton njerëzve që tani janë në grevë, do të jetë gënjeshtër e pastër dhe pse dikush do të donte të gënjehet kështu?”, tha Halili për REL.

Në disa institucione punonjësit e të cilave janë në grevë, nuk kanë marrë pagat e muajit mars, e të tjera nuk kanë marrë rritjen e premtuar. “Ne jemi këtu për të dërguar një mesazh për të gjithë ata që do të kërkojnë votën e këtyre njerëzve. Ata qëndronin për pagesë dhe asgjë tjetër. Nesër dikush do të kërkojë votën e tij në zgjedhje. Si do ta marrë, varet se çfarë do t’u japë këtyre njerëzve”, tha Trendafilov nga protesta e punëtorëve të kulturës.

SPECIALISTËT PRIVATË

Ata kërkojnë kompensim në shumën e pagës mesatare, në vend të 26.000 denarë që janë aktualisht në muaj, rregullim të statusit dhe sigurim shëndetësor.

Qeveria në një seancë të 17 prillit ka marrë vendim për zgjidhjen e problemit me pagat e tyre pas zgjedhjeve. Është e papranueshme për specializantët. “Sepse, nëse këta 400 specializant privatë nuk i marrin kërkesat e tyre, jam e sigurt se gjysma e tyre tashmë i kanë valixhet në një cep në shtëpi dhe janë në pritje të paketimit dhe largimit”, tha Dr. Hristina Ilioska Ceslaroska në emër të specialistëve privatë.

Ajo ka reaguar ndaj deklaratës së ministrit të Shëndetësisë, Ilir Demiri, i cili tha se pas grevës sheh prapavijë politike. “Është e turpshme që një mjek nuk ka sigurim shëndetësor dhe nuk ka asnjë parti politike që duhet të na motivojë të kërkojmë të drejtat tona. “Unë personalisht nuk kam asnjë kartelë nga partia, e vetmja kartë që kam në shtëpi është karta e dhurimit të gjakut”, tha Ilioska Ceslaroska.

Paga mesatare në Maqedoninë e Veriut ka arritur në 39.524 denarë, ndërsa paga minimale rreth 22.500 denarë, por një familje katër anëtarëshe me një mesatare dhe një pagë minimale mezi e mbulon me shportën e indeksit. (koha.mk)