Shëndeti i adoleshentëve në rrezik: Obeziteti dhe çrregullimet mendore në rritje

Një raport i ri nga Komisioni Lancet mbi Shëndetin dhe Mirëqenien e Adoleshentëve paralajmëron se deri në vitin 2030, të paktën gjysma e adoleshentëve në botë do të jenë në rrezik të përballen me probleme serioze shëndetësore. Studimi thekson se ky brez, i pari që rritet në kushte më të ashpra klimatike dhe në një epokë të dominuar nga teknologjitë dixhitale, po përballet me kërcënime globale shëndetësore në mënyrë disproporcionale.

Obeziteti dhe mbipesha janë rritur tetëfish në disa vende afrikane dhe aziatike gjatë tre dekadave të fundit. Parashikimet tregojnë se deri në vitin 2030, rreth 464 milionë adoleshentë në mbarë botën do të jenë mbipeshë ose obezë, një rritje prej 143 milionë krahasuar me vitin 2015.

Në fushën e shëndetit mendor, raporti parashikon se deri në vitin 2030, do të humbasin 42 milionë vjet jetë të shëndetshme për shkak të çrregullimeve mendore ose vetëvrasjeve, një rritje prej 2 milionë krahasuar me vitin 2015. Për më tepër, mbi një miliard adoleshentë do të jetojnë ende në vende ku problemet e parandalueshme dhe të trajtueshme, si HIV/AIDS, shtatzënia e hershme, depresioni, ushqyerja e keqe dhe lëndimet, do të vazhdojnë të kërcënojnë mirëqenien e tyre.

Raporti thekson se adoleshentët në vendet me të ardhura të ulëta dhe të mesme përbëjnë mbi një të katërtën e popullsisë, por marrin vetëm 2.4% të ndihmës globale për zhvillim, pavarësisht se mbajnë 9.1% të barrës globale të sëmundjeve.

Tranzicioni dixhital po ofron mundësi të reja për arsim, punësim, promovim shëndetësor dhe ndërveprim shoqëror, por gjithashtu po ngre shqetësime për dëme të mundshme në zhvillimin dhe mirëqenien e adoleshentëve. Raporti nënvizon se të rinjtë nga më shumë se 36 vende kanë luajtur një rol qendror në formimin e Komisionit, duke kërkuar të drejtën e tyre për të marrë pjesë në formulimin e politikave, kërkimin dhe promovimin e zgjidhjeve që ndikojnë drejtpërdrejt në jetën e tyre.

Flaka