Ekspertët: Si ta konsumoni peshkun pa rrezikuar shëndetin

Peshku konsiderohet një nga ushqimet më të shëndetshme, i pasur me omega-3, proteina cilësore dhe vitamina që mbështesin shëndetin e zemrës dhe trurit. Por, sipas ekspertëve, edhe ky super-ushqim mund të kthehet në rrezik nëse konsumohet pa kujdes.

Një nga shqetësimet kryesore është akumulimi i merkurit, sidomos tek peshqit e mëdhenj si toni, peshku shpatë, peshkaqeni dhe skumbria mbretërore. Organizata Botërore e Shëndetësisë paralajmëron se nivelet e larta të merkurit mund të dëmtojnë sistemin nervor, ndërsa tek gratë shtatzëna mund të ndikojnë në zhvillimin e fetusit.

Rreziqe të tjera lidhen me përgatitjen jo të duhur, që mund të shkaktojë helmime nga baktere, parazitë apo toksina, si dhe me alergjitë ushqimore, të cilat në raste të rralla mund të çojnë në anafilaksi. Edhe omega-3, megjithëse e dobishme, në doza shumë të larta mund të rrisë rrezikun e gjakderdhjes dhe uljes së tepërt të tensionit.

Ekspertët theksojnë se mënyra e gatimit është vendimtare: peshku i zier, i pjekur në skarë ose i gatuar me avull ruan vlerat ushqyese, ndërsa skuqja dhe salcat e rënda shtojnë kaloritë dhe yndyrnat e pashëndetshme.

Rekomandimet kryesore:

• Konsumoni peshk 2–3 herë në javë
• Zgjidhni lloje me pak merkur (salmon, sardele, troftë, tilapi)
• Gatuajeni gjithmonë mirë, sidomos nëse është i ngrirë ose i papërpunuar
• Gratë shtatzëna dhe fëmijët e vegjël të shmangin peshqit me përmbajtje të lartë merkuri

Flaka