Apple pezullon Vision Pro të ri, përshpejton zhvillimin e syzeve inteligjente

Gjigandi amerikan Apple ka vendosur të zhvendosë fokusin nga gjenerata e ardhshme e kufjeve Vision Pro drejt zhvillimit të një palë syzeve inteligjente të realitetit të shtuar, sipas raportimeve të Bloomberg.

Burime pranë kompanisë bëjnë të ditur se Apple ka ndërprerë punën për një version më të lirë dhe më të lehtë të Vision Pro, duke zhvendosur inxhinierët në projektin e syzeve, me qëllim që të mos humbasë terren ndaj Meta-s, e cila prezantoi së fundmi Meta Ray-Ban Display, syzet e para me ekran të integruar.

Sipas analistit Mark Gurman, Apple kishte planifikuar të prezantonte syzet në vitin 2027, por konkurrenca e Metës e ka detyruar të përshpejtojë procesin. Modeli i parë, i koduar si N50, pritet të lidhet me një iPhone dhe nuk do të ketë ekran të vetin. Ky version mund të prezantohet që vitin e ardhshëm, përpara lançimit zyrtar në 2027.

Një element kyç i këtij projekti është Siri i ri, i cili do të përditësohet në vitin 2026 me inteligjencë artificiale gjeneruese, duke u bërë qendra e përvojës së përdoruesit si në kufje, ashtu edhe në syze.

Megjithatë, Apple nuk do ta braktisë plotësisht Vision Pro. Dokumente të publikuara nga Komisioni Federal i Komunikimeve i SHBA-së sugjerojnë se një version më i lehtë i kufjeve ekzistuese është ende në zhvillim. Modeli aktual i Vision Pro kushton 3,499 dollarë.

Ky ndryshim strategjie tregon qartë se Apple synon të pozicionohet fuqishëm në tregun e realitetit të shtuar, ku konkurrenca me Meta pritet të jetë e ashpër në vitet e ardhshme.

Flaka