Ansu Fati thyen rekordin 77-vjeçar në Ligue 1 – “rilindja e një ylli”

Rikthimi i Ansu Fatit në Ligue 1 është shndërruar në një nga befasitë më të mëdha të futbollit evropian. Sulmuesi spanjoll, i huazuar nga Barcelona tek AS Monaco, jo vetëm që ka rigjetur instinktin e golit, por gjithashtu ka thyer një rekord historik që kishte qëndruar për 77 vjet në kampionatin francez.

Me vetëm 126 minuta në fushë, Fati u bë lojtari më i shpejtë që arrin në pesë gola në Ligue 1 që nga viti 1948, duke tejkaluar shifrën e mëparshme të Johan Audel (137 minuta me Valenciennes).

Në vetëm tre ndeshje kampionati, 22-vjeçari ka shënuar pesë gola – plus një tjetër në Ligën e Kampionëve – duke pasur një mesatare prej 1.67 golash për ndeshje dhe duke ndarë vendin e parë në listën e golashënuesve me Joaquín Panichelli të Strasbourgut.

Performanca e tij më e fundit ishte vendimtare në barazimin 2-2 ndaj Nicës në derbin e Côte d’Azur, ku shënoi dy gola nga penalltia për të siguruar një pikë të vlefshme për Monacon.

Trajneri Adi Hütter e vlerësoi lart lojtarin: “Ai është në një moment të madh besimi. Është një lojtar që bën diferencën sa herë që prek topin.”

Pas viteve të vështira me lëndime, Ansu Fati po përjeton një rilindje të vërtetë futbollistike. Që nga shpërthimi i tij te Barcelona në vitin 2019, kur debutoi vetëm 16 vjeç, karriera e tij ishte penguar nga dëmtimet. Por koha në Ligue 1 po i rikthen ritmin, vetëbesimin dhe efikasitetin para portës.

Shtypi francez tashmë e përshkruan si “xhevahirin e rilindur të futbollit evropian”, ndërsa nëse ruan këtë nivel, Fati jo vetëm që do të ketë thyer një rekord historik, por edhe do të ketë shuar çdo dyshim mbi të ardhmen e tij në elitën e futbollit botëror.

Flaka