Peshku, superushqimi i detit: përfitimet që nuk duhet t’i humbisni

Peshqit e pasur me yndyrna të shëndetshme, si salmoni, sardelet dhe trofta, janë ndër burimet më të mira të omega-3, një acid yndyror i domosdoshëm për organizmin. Sipas të dhënave të AgroWeb.org, dy llojet kryesore të omega-3 që gjenden tek peshqit – EPA (acidi eicosapentaenoic) dhe DHA (acidi docosahexaenoic) – kanë rol të madh në mbrojtjen e trupit nga inflamacioni, duke ndihmuar në parandalimin e Alzheimerit, sëmundjeve të zemrës dhe diabetit.

Përveç omega-3, peshku është një burim i pasur me:

• Vitaminë D, e cila gjendet rrallë në ushqime dhe është thelbësore për përthithjen e kalciumit dhe forcimin e kockave.
• Proteina cilësore, që ndihmojnë në ndërtimin e muskujve, shëndetin e lëkurës dhe shërimin e plagëve.
• Kalcium, i domosdoshëm për kocka dhe dhëmbë të fortë, si edhe për funksionimin e nervave dhe muskujve.

Ekspertët rekomandojnë konsumimin e peshkut të paktën dy herë në javë. Nëse kjo nuk është e mundur, vaji i peshkut dhe ushqime të tjera të pasura me omega-3 dhe vitaminë D mund të ndihmojnë në plotësimin e nevojave ushqyese.

Mungesa e këtyre lëndëve ushqyese, sidomos e vitaminës D dhe omega-3, mund të shkaktojë dobësim të imunitetit, osteoporozë dhe rritje të rrezikut për infeksione të rrugëve të frymëmarrjes.

Flaka