Studim i ri: Dieta mesdhetare e gjelbër me çaj jeshil ngadalëson plakjen e trurit

Plakja e trurit dhe çrregullimet neurologjike të lidhura me të, si dëmtimi i lehtë njohës dhe sëmundja e Alzheimerit, përbëjnë një sfidë të madhe për shëndetin publik. Por një studim i ri shkencor ka nxjerrë në pah fuqinë e ushqyerjes në ruajtjen e funksioneve njohëse.

Hulumtimi, i publikuar në revistën Clinical Nutrition, ka zbuluar se një dietë mesdhetare e gjelbër, e pasuruar me çaj jeshil, mund të ngadalësojë procesin e plakjes së trurit. Studimi DIRECT PLUS, një nga më të gjatat mbi lidhjen mes ushqyerjes dhe shëndetit të trurit, përfshiu rreth 300 persona që ndoqën për 18 muaj një nga tre llojet e dietave:

• Një dietë tipike të shëndetshme
• Një dietë tradicionale mesdhetare me kufizim kalorish
• Një dietë mesdhetare të gjelbër, e pasuruar me çaj jeshil

Analizat treguan se pjesëmarrësit që ndoqën dietën mesdhetare të gjelbër kishin ulje të niveleve të proteinave në gjak që lidhen me plakjen e shpejtë të trurit. Studiuesit besojnë se ky efekt mbrojtës vjen nga substancat anti-inflamatore të çajit jeshil.

Sipas Anat Meir, studiuese në Shkollën Harvard Chan, “studimi i proteinave në gjak na lejon të kuptojmë se si proceset e plakjes së trurit ndikohen nga ndryshimet në stilin e jetës dhe në dietë”.

Ky zbulim ofron një pamje të re mbi parandalimin e rënies njohëse, duke sugjeruar se zgjedhjet e përditshme ushqimore mund të luajnë rol kyç në mbrojtjen e trurit nga sëmundjet neurodegjenerative.

Flaka