Agjërimi në Ramazan dhe përfitimet për shëndetin: Ja çfarë thonë ekspertët

Agjërimi gjatë muajit të shenjtë të Ramazanit nuk është vetëm një praktikë shpirtërore, por edhe një mundësi për përmirësimin e shëndetit fizik dhe mendor. Përveç dimensionit fetar, ekspertët theksojnë se agjërimi mund të sjellë një sërë përfitimesh për organizmin, duke ndikuar pozitivisht në metabolizëm, sistemin imunitar dhe mirëqenien e përgjithshme.

Ndihmon në humbjen e peshës dhe përmirëson metabolizmin

Gjatë agjërimit, trupi përshtatet me një regjim të kufizuar ushqimi dhe fillon të përdorë rezervat e yndyrës si burim energjie. Ky proces ndihmon në djegien e yndyrës së tepërt dhe mund të kontribuojë në humbjen e peshës. Njëkohësisht, metabolizmi bëhet më efikas në përdorimin e kalorive.

Kontroll më i mirë i sheqerit në gjak

Agjërimi mund të ndikojë në uljen e rezistencës ndaj insulinës dhe në përmirësimin e ndjeshmërisë së saj. Duke përdorur rezervat e glukozës për energji, trupi ndihmon në stabilizimin e niveleve të sheqerit në gjak. Ulja e inflamacionit dhe humbja e peshës janë faktorë shtesë që ndikojnë pozitivisht në këtë proces.

Forcon sistemin imunitar

Një ndër proceset që aktivizohet gjatë agjërimit është autofagjia – mekanizëm përmes të cilit trupi pastron dhe riciklon qelizat e dëmtuara. Ky proces mund të ndihmojë në përmirësimin e funksionit të sistemit imunitar dhe në rigjenerimin e qelizave të shëndetshme.

Përmirëson cilësinë e gjumit

Agjërimi mund të ndikojë në rregullimin e ritmeve cirkadiane dhe në uljen e nivelit të kortizolit, hormonit të stresit. Gjithashtu, besohet se ndikon në rritjen e prodhimit të melatoninës, hormonit që rregullon gjumin, duke përmirësuar cilësinë dhe kohëzgjatjen e tij.

Ndihmon në uljen e presionit të gjakut

Reduktimi i natriumit, ulja e inflamacionit dhe humbja e peshës janë faktorë që mund të kontribuojnë në uljen e presionit të gjakut. Përmirësimi i ndjeshmërisë ndaj insulinës gjithashtu lidhet me stabilizimin e tensionit arterial.

Megjithatë, specialistët rekomandojnë që personat me sëmundje kronike të konsultohen me mjekun përpara se të fillojnë agjërimin, në mënyrë që të shmangen rreziqet e mundshme shëndetësore.

Flaka