Vezë kafe apo të bardha? Ja çfarë thonë ekspertët për dallimet reale

Të zgjedhësh mes vezëve kafe dhe atyre të bardha është një dilemë e zakonshme për shumë konsumatorë përpara rafteve të marketeve. Shumë besojnë se vezët kafe janë më të shëndetshme, më ushqyese apo më “natyrale” krahasuar me ato të bardha. Por sipas nutricionistëve dhe shkencëtarëve të ushqimit, realiteti është shumë më i thjeshtë.

Ekspertët theksojnë se ngjyra e guaskës nuk ka lidhje të drejtpërdrejtë me vlerën ushqyese të vezës. Ajo përcaktohet nga gjenetika e pulës dhe jo nga cilësia apo përmbajtja e saj ushqyese. Vezët kafe marrin ngjyrën nga pigmentet e quajtura protoporfirina, të cilat depozitohen gjatë formimit të vezës, ndërsa vezët e bardha prodhohen nga raca pulash që nuk depozitojnë këto pigmente.

Në praktikë, pulat me pupla të bardha zakonisht lëshojnë vezë të bardha, ndërsa ato me pupla të kuqe ose kafe lëshojnë vezë kafe. Megjithatë, kjo nuk ndikon në përmbajtjen e proteinave, vitaminave apo mineraleve.

Studimet krahasuese tregojnë se vezët e bardha dhe ato kafe kanë profile ushqyese pothuajse identike. Të dyja përmbajnë rreth 6-7 gramë proteina për vezë, më pak se 80 kalori, si dhe vitamina A, D, E dhe K. Po ashtu, janë burim i mirë hekuri, seleni dhe koline – një lëndë ushqyese e rëndësishme për funksionin e trurit dhe kujtesën.

Ajo që ka më shumë rëndësi për cilësinë e vezës është dieta e pulës, kushtet e mbarështimit dhe freskia e produktit. Për shembull, pulat e ushqyera me dieta të pasura me omega-3 mund të prodhojnë vezë me përmbajtje më të lartë të këtyre acideve yndyrore, pavarësisht ngjyrës së guaskës.

Sa i përket çmimit, vezët kafe shpesh kushtojnë më shumë për arsye ekonomike. Rracat e pulave që prodhojnë vezë kafe zakonisht janë më të mëdha dhe kërkojnë më shumë ushqim, duke rritur kostot e prodhimit. Për më tepër, perceptimi i konsumatorëve se vezët kafe janë “më cilësore” ka ndikuar historikisht në ruajtjen e një çmimi më të lartë në treg.

Në fund, zgjedhja mes vezëve kafe dhe atyre të bardha mbetet çështje preference personale, pasi nga pikëpamja ushqyese, dallimet janë minimale.

Flaka