A duhet larë orizi para gatimit? Ja çfarë thonë ekspertët

Prej dekadash, amvisat shqiptare e kishin zakon të shpëlanin orizin me ujë të ftohtë përpara gatimit. Me kalimin e kohës dhe ndryshimin e zakoneve ushqimore, kjo praktikë nisi të harrohej, duke u konsideruar nga disa si e panevojshme. Por ekspertët thonë se larja e orizit është një hap i rëndësishëm që ndikon drejtpërdrejt në cilësinë e gatimit.

Sipas tyre, shpëlarja e orizit largon papastërtitë e akumuluara gjatë paketimit dhe eliminon niseshten që mbulon kokrrat, duke parandaluar ngjitjen e tyre gjatë zierjes. Ky proces është veçanërisht i rëndësishëm për orizin kokërr gjatë, pasi ndihmon që pilafi të shkërmoqet dhe të jetë më i lehtë për t’u konsumuar.

Megjithatë, ky rregull nuk vlen për gatime si rizotoja, ku kremoziteti i saj vjen pikërisht nga niseshteja e kokrrave. Përveç kësaj, disa studime kanë treguar se në disa paketime orizi mund të gjendet edhe pluhur shkumësi, i cili përdoret për të parandaluar lagështinë. Edhe pse nuk është i rrezikshëm për shëndetin, ekspertët sugjerojnë që larja e orizit është një mënyrë e thjeshtë për ta eliminuar atë.

Nga ana tjetër, për orizin e bardhë, i cili është i përpunuar dhe i zhveshur nga shumica e ushqyesve, shpëlarja nuk ndikon shumë në vlerat ushqyese, por mbetet e rëndësishme për pastërtinë dhe cilësinë e gatimit.

Flaka