Aleanca për Shqiptarët kërkon transparencë për përfaqësimin e shqiptarëve në polici

Aleanca për Shqiptarët shpreh shqetësim serioz për të dhënat e bëra publike lidhur me përfaqësimin e shqiptarëve në Ministrinë e Punëve të Brendshme, veçanërisht në radhët e policisë, ku parimi i përfaqësimit të drejtë dhe adekuat duhet të zbatohet plotësisht.

Sipas të dhënave të publikuara, nga 549 policë të rinj të pranuar, më pak se 40 janë shqiptarë, ose rreth 7 për qind. Po ashtu, nga 30 policë të dekoruar si më të mirët, vetëm një është shqiptar.

Në anën tjetër, MPB-ja më 31 korrik njoftoi zyrtarisht se 496 kandidatë kanë përfunduar me sukses trajnimin bazë dhe i janë bashkuar policisë, por pa publikuar strukturën etnike të tyre.

Kjo mospërputhje e shifrave dhe mungesa e të dhënave zyrtare për përkatësinë etnike e bëjnë të domosdoshme transparencën e menjëhershme të Ministrisë së Punëve të Brendshme.

Nëse të dhënat e bëra publike nuk janë të sakta, MPB-ja duhet t’i përgënjeshtrojë ato me fakte dhe të dhëna zyrtare. Nëse janë të sakta, atëherë kemi të bëjmë me një prapakthim alarmant të përfaqësimit të shqiptarëve në një nga institucionet më të rëndësishme të shtetit.

Aleanca për Shqiptarët kërkon nga MPB-ja dhe nga zëvendësministri shqiptar, nga radhët e VLEN-it, që menjëherë të publikojnë strukturën etnike të pranimeve të fundit në polici, të sqarojnë kriteret e përdorura gjatë përzgjedhjes dhe dekorimeve, si dhe të garantojnë respektimin konsekuent të parimit të përfaqësimit të drejtë dhe adekuat në të gjitha nivelet e MPB-së.

VLEN-i nuk mund të heshtë përballë shifrave të tilla. Ata që premtuan dinjitet dhe përfaqësim për shqiptarët kanë sot përgjegjësi institucionale dhe duhet të japin përgjigje se çfarë po ndodh me përfaqësimin e shqiptarëve në polici.

Aleanca për Shqiptarët nuk do të lejojë që përfaqësimi i shqiptarëve në institucionet shtetërore të kthehet prapa. Përfaqësimi i drejtë dhe adekuat nuk është privilegj dhe as favor politik, por parim kushtetues që duhet respektuar. Gazeta Flaka