Buka e bardhë, pse duhet ta kufizoni

Për vite me radhë, buka është parë si një nga “armiqtë” kryesorë të dietave, por nutricionistët pohojnë se ky perceptim nuk është plotësisht i saktë. Sipas tyre, buka mund të jetë një burim i rëndësishëm ushqyesish, duke plotësuar mbi 10% të nevojave ditore për proteina, folate dhe hekur.

Megjithatë, përfitimet vlejnë kryesisht për bukën integrale, atë me tërshërë, thekër apo misër, të cilat janë të pasura me fibra, minerale dhe vitamina B.

Ngjyra nuk tregon gjithmonë cilësinë – buka e errët mund të jetë thjesht e lyer me ngjyrues, ndaj kriteri më i mirë është përbërja dhe lloji i miellit. Ekspertët theksojnë se buka më e fortë dhe më pak e përpunuar është më e shëndetshme.

Thekra konsiderohet më e mira për shëndetin, falë përmbajtjes së lartë të fibrave, vitaminave dhe indeksit të ulët glicemik, që ofron ndjesi ngopjeje afatgjatë. Edhe buka me miell tërshëre, fara dhe arra është një zgjedhje e shkëlqyer.

Nga ana tjetër, buka e bardhë ka vlerë të ulët ushqyese, shpesh përmban sheqer dhe kripë të fshehur dhe ka indeks të lartë glicemik, duke shkaktuar rritje të shpejtë të sheqerit në gjak dhe ndjesi të shkurtër ngopjeje.

Ekspertët rekomandojnë konsumimin e bukës në sasi të moderuar (200–300 g në ditë) dhe kujdes me shtesat si gjalpi, sallami apo majoneza, të cilat janë shpesh shkaku kryesor i shtimit në peshë.

Flaka