Florentino Pérez: Nuk largohem derisa dikush të më mund

Presidenti i Real Madrid, Florentino Pérez, ka reaguar ashpër ndaj zërave dhe kritikave që kanë qarkulluar së fundmi rreth të ardhmes së tij në krye të klubit madrilen.

Në një deklaratë të fortë dhe plot vetëbesim, Pérez theksoi se nuk ka ndërmend të largohet nga posti i presidentit, duke sfiduar hapur çdo kundërshtar të mundshëm në zgjedhjet e ardhshme të klubit.

“Do të largohem vetëm kur dikush të më mundë në zgjedhje. Le të shohim kush fiton kundër meje”, deklaroi ai.

Kreu i klubit reagoi edhe ndaj thashethemeve mbi gjendjen e tij shëndetësore dhe pretendimeve se dëshiron të largohet nga drejtimi i “Los Blancos”.

“Njerëzit thonë se kam kancer, se dua të largohem… doni të largohem? Në rregull, le të mbahen zgjedhjet dhe të shohim kush fiton”, u shpreh Pérez.

Ai shtoi se do të kandidojë sërish për të “mbrojtur interesat e anëtarëve të Real Madridit”, duke insistuar se presionet dhe sulmet ndaj tij vetëm sa i japin më shumë motivim.

“Askush nuk do të më frikësojë. Këto gjëra më japin energji. Jam ende president i klubit, ashtu siç drejtoj edhe kompaninë time me qarkullim miliarda euro në vit”, deklaroi ai.

Në fund, Pérez mohoi kategorikisht zërat për probleme shëndetësore:

“Shëndeti im është perfekt. Nëse do të kisha kancer, e gjithë bota do ta dinte”.

Deklaratat e presidentit të Real Madridit kanë bërë bujë të madhe në mediat sportive dhe pritet të sjellin reagime të shumta nga tifozët dhe opinioni publik.

Flaka