Foshnja më e vjetër në botë lind nga embrion i ngrirë në 1994

Një ngjarje e jashtëzakonshme ka ndodhur më 26 korrik 2025 në Ohio, SHBA, ku ka lindur Thaddeus Daniel Pierce, një foshnjë e shëndetshme e cila u zhvillua nga një embrion i ngrirë në vitin 1994 – duke vendosur një rekord botëror si foshnja më e vjetër e lindur ndonjëherë nga një embrion i ruajtur.

Embrioni ishte pjesë e një trajtimi IVF për Linda Archard dhe ish-bashkëshortin e saj, të cilët krijuan katër embrione. Njëri u implantua menjëherë dhe solli në jetë vajzën e tyre – tani një grua 30-vjeçare dhe nënë e një vajze 10-vjeçare. Tre embrionet e mbetura u ruajtën në ngrirje për më shumë se tre dekada.

Pas divorcit, Linda mbajti kujdestarinë e embrioneve dhe vendosi t’i dhurojë përmes një programi të veçantë të quajtur “adoptim embrionesh”, i organizuar nga agjenci të krishtera në SHBA. Embrionet u përfshinë në një kategori të quajtur “embrione të vështira për t’u adoptuar”, për shkak të kohës së gjatë në ruajtje.

Lindsey (35) dhe Tim (34) Pierce, pas shtatë vitesh përpjekjesh të pasuksesshme për të pasur fëmijë, iu bashkuan programit dhe pranuan transferimin e tri embrioneve. Njëri prej tyre u implantua me sukses dhe rezultoi në lindjen e Thaddeusit.

“Nuk synuam të thyenim ndonjë rekord – thjesht donim të kishim një fëmijë,” tha Lindsey për MIT Technology Review.

Ky rast nxjerr në pah potencialin e ruajtjes afatgjatë të embrioneve, si dhe sfidat etike dhe teknike që lidhen me trajtimet IVF. Aktualisht, vlerësohet se qindra miliona embrione ndodhen në ngrirje në të gjithë botën.

Flaka