Hakimi, shtylla e PSG-së: rikthimi te Real Madrid mbetet ëndërr e largët

Që prej mbërritjes së tij te Paris Saint-Germain, Achraf Hakimi ka ndërtuar një reputacion të fortë si një nga mbrojtësit e krahut më të mirë në futbollin evropian. Në moshën 26-vjeçare, ai është shndërruar në një shtyllë të projektit të Luis Enrique-s, duke kombinuar shpejtësinë, forcën mbrojtëse dhe depërtimet e rrezikshme në sulm.

Në ndeshjen e fundit të Ligës së Kampionëve kundër Barcelonës, Hakimi ishte protagonist absolut: shpëtoi një gol me një ndërhyrje vendimtare dhe asistoi golin e fundit që vulosi përmbysjen e PSG-së. Përveç performancës në fushë, ai ka marrë disa herë edhe shiritin e kapitenit, duke treguar peshën e tij simbolike brenda dhomës së zhveshjes.

Kontrata e tij me PSG-në zgjat deri në vitin 2029, një sinjal i qartë i ambicies së klubit për ta mbajtur pavarësisht ofertave të shumta. Megjithatë, spekulimet për një rikthim te Real Madrid nuk kanë munguar. Që nga largimi i tij në vitin 2020, shumë në “Santiago Bernabéu” e kanë konsideruar atë si një gabim strategjik. Lidhja e ngushtë me Kylian Mbappé, tashmë lojtar i Realit, shton elementin emocional të një ribashkimi të mundshëm.

Sidoqoftë, një transferim duket i pamundur për momentin. Financial Fair Play, kontrata e gjatë dhe çmimi i lartë i kartonit (rreth 90 milionë euro) e bëjnë çdo negociatë shumë të vështirë. Për më tepër, prania e Dani Carvajal në skuadrën madrilene kufizon hapësirën për një rikthim të shpejtë.

Përtej spekulimeve, Hakimi mbetet i fokusuar te PSG-ja dhe objektivat madhorë: fitimi i trofeve dhe dominimi në Evropë. Me lidershipin dhe karakterin e tij, ai është kthyer në një nga pikat më të forta të klubit parizien, duke u konfirmuar si një nga mbrojtësit më të mirë në botë.

Flaka