Igli Tare pas humbjes së Milanit: Tifozët meritojnë një ekip tjetër

Igli Tare ka reaguar pas humbjes së AC Milan ndaj Atalantas, duke pranuar se skuadra nuk tregoi nivelin dhe tensionin e duhur në një moment delikat të sezonit.

Drejtori sportiv i Milanit bëri të ditur se menjëherë pas ndeshjes ka zhvilluar një analizë me trajnerin, ndërsa theksoi se fokusi tashmë është te dy sfidat e fundit të kampionatit.

“E analizova ndeshjen me trajnerin pas minutës së 90-të. Duhet të mbetemi të përqendruar në dy ndeshjet e fundit. Reagimi në dhomën e zhveshjes ishte i duhuri, tani duhet të kalojmë nga fjalët në veprime. Ndoshta do të shkojmë në tërheqje disa ditë para Genoas”, deklaroi Tare.

Ai nuk fshehu zhgënjimin për paraqitjen e skuadrës dhe u kërkoi falje tifozëve kuqezi.

“Mungonte tensioni i duhur. Duhet të marrim përgjegjësitë tona. Tifozët meritojnë një ekip tjetër”, shtoi drejtori sportiv shqiptar.

Tare u pyet edhe për zërat rreth një largimi të mundshëm në fund të sezonit, por ai theksoi se nuk ka marrë sinjale negative nga klubi.

“A jam nën diskutim? Nuk kam marrë asnjë sinjal nga klubi, po përqendrohem në punën time. Nëse arrijmë objektivin tonë, do të kemi bërë një punë të shkëlqyer. Pjesa tjetër, përkatësisht spekulimet, janë pjesë e punës sonë”, përfundoi ai.

Deklaratat e Tares vijnë në një moment kritik për Milanin, që po lufton për të mbyllur sezonin në mënyrën më të mirë të mundshme dhe për të siguruar objektivat europiane.

Flaka