Laporta ndez spekulimet për Julián Álvarez: Do t’i bëjmë realitet ëndrrat e lojtarëve që duan Barcelonën

Presidenti i Barcelonës, Joan Laporta, ka bërë një deklaratë që ka nxitur menjëherë spekulime rreth merkatos dhe veçanërisht rreth interesimit të klubit katalanas për Julián Álvarez.

Në një intervistë për El Chiringuito, Laporta u shpreh se Barcelona dëshiron t’u japë mundësinë lojtarëve që ëndërrojnë të veshin fanellën blaugrana.

“Shpresojmë t’i bëjmë realitet ëndrrat e lojtarëve që duan t’i bashkohen Barcelonës. Është e qartë se ëndrrat bëhen realitet. Nëse punon dhe lufton për to, ato realizohen. Më pëlqen shumë fakti që ka lojtarë, madje besoj shumica e tyre, që duan të luajnë për Barcelonën dhe kjo na mbush me krenari”, deklaroi Laporta.

Fjalët e presidentit të Barcelonës vijnë vetëm pak ditë pasi Julián Álvarez u shpreh se dëshiron të largohet nga Atletico Madrid për të realizuar ëndrrën e tij, deklaratë që ka shtuar zërat për një transferim të mundshëm në “Camp Nou”.

Edhe pse Laporta nuk e përmendi emrin e sulmuesit argjentinas, komentet e tij janë interpretuar nga shumë media si një sinjal se Barcelona mbetet e interesuar për transferimin e Álvarez gjatë kësaj vere.

Megjithatë, deri në këtë moment nuk ka asnjë marrëveshje zyrtare mes Barcelonës dhe Atletico Madridit, ndërsa negociatat pritet të vazhdojnë në javët e ardhshme.

Flaka