Lautaro: “Dua ta mbyll karrierën me fanellën e Interit”

Kapiteni i Inter Milan, Lautaro Martínez, ka bërë një rrëfim emocional për periudhën më të vështirë të tij te zikaltërit, duke pranuar se pas humbjes në Kupën e Botës për Klube kishte menduar edhe për një largim të mundshëm nga klubi italian.

Sulmuesi argjentinas theksoi se dëshira e tij është ta përfundojë karrierën te Interi, por pranoi se në futboll gjithçka mund të ndryshojë.

“Dua ta mbyll karrierën te Interi. Do të largohem vetëm nëse më shesin ose nëse nuk më duan më,” deklaroi Lautaro.

Ai foli hapur edhe për gjendjen e tij emocionale pas finales së humbur dhe eliminimit ndaj Fluminense, duke treguar se ishte në një moment shumë të errët psikologjikisht.

“Nuk po them se kërkova të largohesha nga Interi, por mendova se nëse do të vinte oferta e duhur, ndoshta… Isha vërtet i shkatërruar,” u shpreh sulmuesi.

Lautaro zbuloi gjithashtu se deklarata e tij publike pas humbjes ndaj Fluminenses erdhi si reagim ndaj asaj që kishte parë në dhomën e zhveshjes, duke theksuar se si kapiten ndjeu detyrimin të fliste hapur.

Ndërkohë, ai lavdëroi edhe trajnerin Cristian Chivu për ndikimin pozitiv në skuadër, pa harruar të vlerësojë edhe punën e ish-trajnerit Simone Inzaghi, të cilin e falënderoi për “katër vite të pabesueshme” te Interi.

Flaka