Merkato e nxehtë: Juventusi synon yjet e Real Madridit

Juventus po përgatitet për një merkato ambicioze vere dhe synon të përfitojë nga ndryshimet e mëdha që pritet të ndodhin te Real Madrid.

Sipas raportimeve të mediave italiane, klubi torinez po punon për transferimin e tre futbollistëve madrilenë gjatë afatit kalimtar të verës.

Objektivi kryesor i Juventusit është Brahim Díaz. Mesfushori ofensiv nuk ka pasur rolin e dëshiruar te Real Madridi këtë sezon dhe raportohet se është i hapur për një aventurë të re jashtë Spanjës.

Përveç Brahim Diaz, bardhezinjtë po monitorojnë edhe situatën e talentit të ri Gonzalo García, i cili gjithashtu ka pasur pak hapësira në skuadrën madrilene.

Për të dy lojtarët, Juventusi po mendon formulën e huazimit me të drejtë blerjeje në fund të sezonit, një strategji që klubi italian e ka përdorur shpesh vitet e fundit.

Ndërkohë, emri i tretë në listën e Juventusit është ai i David Alaba. Mbrojtësit austriak i përfundon kontrata në fund të qershorit dhe pritet të largohet si lojtar i lirë.

Megjithatë, pengesa kryesore për transferimin e Alabës mbetet paga e tij e lartë. Sipas raportimeve, lojtari do të duhet të pranojë ulje të konsiderueshme të pagës nëse dëshiron të transferohet në Torino.

Merkatoja e verës pritet të jetë shumë intensive për të dy klubet, ndërsa Juventusi synon të rikthehet fuqishëm në elitën evropiane me afrime cilësore.

Flaka