Nico Williams emocionon me mesazhin pas lëndimit: “Historia nuk ka mbaruar”

Ylli i Spanjës, Nico Williams, ka ndarë një mesazh prekës në rrjetet sociale pasi pësoi një tjetër lëndim, duke e cilësuar momentin si “një nga ditët më të këqija të jetës” së tij.

Sulmuesi zbuloi se ka kaluar një periudhë jashtëzakonisht të vështirë, duke luftuar për më shumë se një vit me osteitis pubis, një problem fizik që i shkaktoi dhimbje të vazhdueshme dhe ndikoi ndjeshëm si në karrierën e tij, ashtu edhe në jetën e përditshme.

“Ka qenë një vit e gjysmë me dhimbje, trishtim, pasiguri dhe ankth. Nuk e dija se kur do të mund të luaja sërish pa dhimbje apo të rikthehesha në një jetë normale”, shkroi Williams.

Pasi arriti ta kapërcejë këtë periudhë falë punës së palodhur dhe disiplinës, ai u përball me një dëmtim në muskujt e kofshës. Tani, Williams ka pësuar një tjetër lëndim, për të cilin tha se erdhi pas një ndërhyrjeje të panevojshme nga një futbollist kundërshtar, i cili, sipas tij, veproi nga frustrimi.

Megjithatë, reprezentuesi spanjoll u shpreh i vendosur të mos dorëzohet.

“Kjo nuk do të më ndalojë. E di që Zoti ka një plan për mua dhe do të vazhdoj të luftoj deri në fund për të bërë atë që dua më shumë: të luaj futboll, të jem i lumtur dhe të sjell gëzim te njerëzit.”

Në fund të mesazhit, Nico Williams falënderoi të gjithë për mbështetjen dhe premtoi se do të rikthehet sa më shpejt në fushë, me synimin për të ndihmuar Spanjën në Kupën e Botës.

Flaka