Pesë ide të shëndetshme për mëngjes që ndihmon në stabilizimin e sheqerit në gjak

Nisja e ditës me një mëngjes të pasur me fibra, proteina dhe yndyrna të shëndetshme mund të ndihmojë në mbajtjen e niveleve të energjisë të qëndrueshme dhe në balancimin e sheqerit në gjak. Kjo është veçanërisht e rëndësishme për personat që vuajnë nga Diabeti ose prediabeti.

Ekspertët theksojnë se mëngjesi është një vakt shumë i rëndësishëm që shpesh neglizhohet, edhe pse mund të ndihmojë në stabilizimin e niveleve të glukozës gjatë ditës. Nutricionistja Vandana Sheth thotë se një mëngjes i ekuilibruar mund të jetë njëkohësisht i shijshëm, i shpejtë dhe i lehtë për t’u përgatitur.

Sipas nutricionistes Maria Fraga, ngrënia e rregullt e mëngjesit mund të ndihmojë në përmirësimin e ndjeshmërisë ndaj insulinës dhe në parandalimin e rritjeve dhe rënieve të papritura të sheqerit në gjak. Ndërkohë, Shoqata Amerikane e Diabetit rekomandon konsumimin e rreth 14 gramëve fibra për çdo 1000 kalori, ndërsa për mëngjes sugjerohet rreth 8–10 gramë fibra.

Ekspertët rekomandojnë disa opsione të shëndetshme për të nisur ditën:

1. Vezë me tofu, avokado dhe perime jeshile
Proteinat ndihmojnë në ndjenjën e ngopjes për më gjatë. Kombinimi i vezëve ose tofu me zarzavate si spinaqi dhe avokado siguron fibra dhe yndyrna të shëndetshme që ndihmojnë në stabilizimin e sheqerit në gjak.

2. Bukë integrale me gjalpë bajamesh dhe manaferra
Buka integrale e pasur me fibra, gjalpi i arrave dhe frutat si boronicat janë një kombinim i thjeshtë që siguron energji dhe ndihmon në mbajtjen e niveleve të glukozës të qëndrueshme.

3. Parfe me kos grek dhe kanellë
Kosi grek është i pasur me proteina dhe probiotikë. Kur kombinohet me fruta, arra dhe kanellë, ai mund të ndihmojë në parandalimin e rritjes së shpejtë të sheqerit në gjak.

4. Bollgur i përgatitur një natë më parë
Tërshëra përmban fibra të tretshme që ndihmojnë në uljen e rezistencës ndaj insulinës dhe në kontrollin e kolesterolit. Mund të kombinohet me fruta të freskëta dhe fara chia ose liri.

5. Mëngjes me perime dhe proteina
Një pjatë me perime, vezë ose gjizë dhe drithëra të plota është një zgjedhje e mirë për të mbajtur balancën ushqyese. Ekspertët rekomandojnë që gjysma e pjatës të mbushet me perime, një e katërta me proteina dhe pjesa tjetër me karbohidrate të pasura me fibra.

Specialistët theksojnë se zgjedhja e ushqimeve të shëndetshme në mëngjes mund të ndikojë pozitivisht jo vetëm në kontrollin e sheqerit në gjak, por edhe në energjinë dhe shëndetin e përgjithshëm gjatë gjithë ditës.

Flaka