Petrovska: LSDM ka 83.000 anëtarë, Filipçe u bë kryetar me 9.000 vota

Ish-ministrja e Mbrojtjes, Sllavjanka Petrovska, pas tërheqjes nga gara për kryetare të LSDM-së dy ditë para zgjedhjeve të menjëhershme, kontestoi fitoren e Venko Filipçes për shkak të numrit të vogël të votuesve të regjistruar në raport me anëtarësinë e përgjithshme të kësaj partie në opozitë, përcjell FLAKA.

“Në vitin 2019 ka pasur një riregjistrim me 83 mijë anëtarë. Herën e fundit që është riregjistruar zyrtarisht. Udhëheqësia konsideroi se nuk është prioritet nëse janë vërtet 83.000, apo vetëm 23.000 si të regjistruar dhe vetëm 12.000 kanë dalë të votojnë”, thotë Petrovska në emisionin “Argument Plus” në TV24.

Deputetja aktuale thotë se votimi është dashur të jetë me regjistrim minimal, pasi siç thotë ajo, kryetari i LSDM-së nuk guxon të zgjidhet vetëm me rreth 9 mijë vota, të cilat i kanë mjaftuar Filipçes.

“Duhet të bëhet një regjistrim me një kufi më të ulët. Një kryetar me 10 mijë vota nuk është kryetar. Regjistrimi duhet të jetë së paku 30 për qind e totalit të anëtarëve.

Heshtja e shumicës është shumë më e frikshme se sa numrat e vegjël. Përkundrazi, mendoj se po dërgojnë një mesazh shumë të fortë si ai që morëm në zgjedhje kur fituam vetëm 153 mijë vota. Ata kanë dyshime për procesin, siç kisha unë dhe vendosa ta bojkotoj atë”, tha ajo.

Sipas Petrovska, anëtarët e partive të tjera si ZNAM dhe VMRO-DPMNE votuan në zgjedhje, dhe Jovan Despotovski, i cili ishte i dyti për sa i përket votave, abuzoi me bazën e të dhënave për t’u dërguar mesazhe anëtarëve që të vijnë të votojnë, diçka që të tjerët nuk kanë pasur mundësi ta bëjnë.

Filipçe u zgjodh kryetar i ri me pak më shumë se 9000 vota. Rreth 23 mijë anëtarë të LSDM-së janë regjistruar për të votuar në zgjedhjet e brendshme partiake të 30 qershorit, por rreth 10 mijë prej tyre nuk kanë dalë të votojnë.

Sipas të dhënave të Komisionit Qendror të Zgjedhjeve të partisë, nga 95 për qind të votave të përpunuara, Jovan Despotovski ka marrë 2705 vota, ndërsa Aleksandar Baidevski 905 vota. Deputetja aktuale dhe ish-ministre e Mbrojtjes, Sllavjanka Petrovska, edhe pse pak para zgjedhjeve tha se tërhiqej nga gara, mori 190 vota. FLAKA