Rinegocimi i propozimit francez mision i (pa) mundur

Rinegocimi i Marrëveshjes me Bullgarinë, dhe në këtë mënyrë ndryshimi i kornizës së negociatave për anëtarësimin e vendit në Union, nuk është i pamundur, por është i vështirë për t’u arritur, sipas disa analistëve, përcjell FLAKA.

Sipas Petar Arsovskit, ka mundësi për përmirësimin e kushteve për rrugën e integrimit evropian të vendit përmes ndryshimeve në protokollin dypalësh, por ai thotë se edhe nëse Sofja zyrtare pranon rinegocimin e propozimit francez, orekset bullgare mund të rriten edhe më shumë dhe kjo do të shkojë në dëm të Maqedonisë.

“Ka një protokoll të tillë dypalësh dhe Bullgaria mund të japë garanci shtesë se nuk do të na bllokojë më tej, mund të zbatojë një vendim të gjykatës në Strasburg, kjo nuk do të thotë se nuk mund të përmirësohen kushtet e përgjithshme për vazhdimin e rrugës drejt BE-së, por vetë kuadri i negociatave është shumë i vështirë. Edhe pse formalisht nuk është e pamundur të ndryshohet kuadri i negociatave, ka ndodhur, pyetja është nëse e hapim sërish, që do të thotë të refuzojmë kuadrin aktual, do të përfundojmë me një kornizë më të mirë apo më të keqe, sepse hapja e kornizës së negociatave do të thotë hapje për kërkesa të reja nga Bullgaria”, sqaron Arsovski.

Ish-ambasadori Risto Nikovski është i mendimit se mund të rinegociohet me Bullgarinë dhe me këtë e gjithë korniza negociuese mund të pësojë ndryshime ose të bëhet krejtësisht e re. Ai pretendon se Maqedonia mund ta bëjë këtë duke anuluar protokollin e dytë të nënshkruar me Bullgarinë, në të cilin është futur propozimi francez, por kjo do të hasë në reagime të ashpra jo vetëm nga Sofja zyrtare, por edhe nga mbarë bashkësia ndërkombëtare.

“Duhet të tërhiqemi urgjentisht nga protokolli i dytë, duke shkatërruar kështu kuadrin e negociatave, sepse e gjithë korniza është reduktuar në këtë protokoll dhe varet vetëm nga zbatimi i marrëveshjeve nga komisioni historik, dhe në të njëjtën kohë, ultimatumi për ndryshimin e Kushtetutës shkatërrohet. Prandaj, duke anuluar këtë protokoll pa prekur marrëveshjet, Maqedonia del nga ngërçi dhe mund të fillojë një rrugë të qartë për në Bruksel. Reagimi i Bullgarisë dhe i komunitetit ndërkombëtar, që kanë interesat e veta dhe që i mbrojnë ato ashpër, do të jetë absolutisht i drejtpërdrejtë dhe i hapur, jashtëzakonisht i mprehtë, por kjo nuk duhet të na trembë, sepse ne jemi të detyruar si shtet të mbrojmë interesat tona”, beson Nikovski.

Kryeministri Mickoski dje tha se nuk e sheh pse nuk mund të rinegociohet marrëveshja bilaterale kur ajo tashmë është ndryshuar një herë me shtimin e propozimit francez. Qëndrimet e BE-së dhe SHBA-së për këtë çështje janë shumë të qarta. Euroambasadori Gir deklaroi hapur se nuk ka mundësi për ndryshim të kornizës së negociatave dhe se negociatat me Bullgarinë dhe Greqinë janë një punë e përfunduar dhe nuk ka vend për negociata të reja për përparimin e vendit drejt BE-së, theksoi qartë edhe ambasadori amerikan Ageler. FLAKA