Rritet në 37.953 numri i palestinezëve të vrarë nga sulmet izraelite në Gaza

Të paktën 28 ​​palestinezë të tjerë janë vrarë në sulmet izraelite në Rripin e Gazës, duke e rritur numrin e përgjithshëm të vdekjeve në 37.953 që nga 7 tetori i vitit të kaluar, tha sot Ministria e Shëndetësisë në enklavën e rrethuar, transmeton Anadolu.

Ministria tha në një deklaratë se 87.266 persona po ashtu janë plagosur nga sulmet. “Forcat izraelite vranë 28 persona dhe plagosën 125 të tjerë në tre ‘masakra’ kundër familjeve në 24 orët e fundit”, tha ministria.

“Shumë njerëz janë ende të bllokuar nën rrënoja dhe në rrugë pasi shpëtimtarët nuk janë në gjendje t’i arrijnë ata”, shtoi ajo.

Izraeli, duke shkelur një rezolutë të Këshillit të Sigurimit të OKB-së që kërkon armëpushim të menjëhershëm, është përballur me reagime ndërkombëtare në mes të ofensivës së tij brutale të vazhdueshme në Gaza që nga një sulm i 7 tetorit 2023 nga grupi palestinez Hamas.

Mbi tetë muaj pas fillimit të luftës izraelite, pjesë të gjera të Gazës janë në rrënoja, krahas një bllokade të dëmshme ndaj ushqimit, ujit të pastër dhe ilaçeve.

Izraeli akuzohet për gjenocid në Gjykatën Ndërkombëtare të Drejtësisë (GJND), e cila në vendimin e saj të fundit urdhëroi Tel Avivin të ndalonte menjëherë operacionin e tij ushtarak në qytetin jugor Rafah, ku mbi një milion palestinezë kishin kërkuar strehim nga lufta përpara se të pushtohej më 6 maj.