Si ta reduktoni varësinë nga telefoni? Këshilla praktike për përdorim më të shëndetshëm

Telefonat inteligjentë janë bërë pjesë e pandashme e jetës sonë të përditshme – nga momenti kur zgjohemi deri para se të flemë. Megjithatë, përdorimi i tepërt mund të ndikojë negativisht në gjumë, përqendrim dhe mirëqenie. Ekspertët sugjerojnë disa hapa të thjeshtë për të reduktuar kohën para ekranit dhe për të krijuar një marrëdhënie më të shëndetshme me teknologjinë.

Mos e mbani telefonin në dhomën e gjumit

Shumë njerëz e përdorin telefonin si alarm, çka e bën atë gjënë e fundit që shohin para gjumit dhe të parën në mëngjes. Një studim i vitit 2017 ka treguar se përdorimi i mediave sociale në 30 minutat e fundit para gjumit lidhet me çrregullime të gjumit. Ekspertët rekomandojnë karikimin e telefonit jashtë dhomës së gjumit dhe përdorimin e një ore tradicionale me alarm.

Kontrolloni njoftimet

Njoftimet e vazhdueshme janë ndër arsyet kryesore pse e marrim telefonin në dorë. Qendra për Teknologjinë Njerëzore rekomandon çaktivizimin e njoftimeve që nuk vijnë nga persona realë – si pëlqime apo sugjerime automatike – dhe lejimin vetëm të mesazheve të rëndësishme.

Kufizoni kohën para ekranit

Sistemet operative Android dhe iOS ofrojnë mundësinë për të monitoruar kohën e kaluar para ekranit. Në vend që thjesht të kontrolloni raportet javore, vendosni kufizime konkrete për aplikacione të caktuara. Për shembull, mund të vendosni një limit prej një ore në ditë për rrjetet sociale, duke shmangur shfletimin e pafund.

Aktivizoni “shkallën gri”

Ndryshimi i ekranit në modalitetin “shkallë gri” redukton tërheqjen vizuale të aplikacioneve. Ngjyrat e forta janë të dizajnuara për të tërhequr vëmendjen dhe për të na mbajtur sa më gjatë në ekran, ndaj ky hap i thjeshtë mund të ulë ndjeshëm kohën e përdorimit.

Pyeteni veten para se ta merrni telefonin

Para se ta hapni telefonin, ndaloni për një moment dhe pyesni veten: “Pse po e bëj këtë?”. Shpesh e përdorim pajisjen nga mërzia apo zakon, jo nga nevoja reale. Ndërgjegjësimi është hapi i parë drejt ndryshimit.

Flaka