Studimi: Lëngu i shegës rrit energjinë dhe balancën hormonale

Pirja e një gote me lëng shege çdo ditë mund të sjellë përfitime të rëndësishme për organizmin, sidomos në rritjen e energjisë dhe balancimin hormonal, sipas disa studimeve shkencore.

Një hulumtim i realizuar nga Queen Margaret University në Edinburg, tregon se konsumimi i rregullt i shegës për rreth dy javë mund të ndikojë pozitivisht në nivelet e hormoneve dhe qarkullimin e gjakut.

Në studim janë përfshirë persona të moshës 21 deri në 64 vjeç, ku pas konsumimit të përditshëm të lëngut të shegës është vërejtur rritje e vitalitetit, përmirësim i humorit dhe rritje e hormoneve të rëndësishme si testosteroni dhe estrogjeni.

Studiuesit theksojnë se testosteroni lidhet me energjinë, kujtesën dhe gjendjen emocionale, ndërsa estrogjeni luan rol kyç në mirëqenien dhe ekuilibrin hormonal te femrat. Sipas rezultateve, niveli i testosteronit është rritur me 16 deri në 30% tek pjesëmarrësit.

Përveç ndikimit hormonal, shega konsiderohet një frut i pasur me antioksidantë, vitamina dhe minerale, të cilat ndihmojnë në përmirësimin e shëndetit të përgjithshëm dhe luftimin e disa sëmundjeve.

Ekspertët rekomandojnë konsumimin e rreth 250–350 ml lëng shege në ditë, duke theksuar rëndësinë e zgjedhjes së lëngut 100% natyral pa sheqerna të shtuar.

Flaka