Tchouaméni kërkon falje publike pas incidentit te Real Madridi: Fokus total te El Clásico

Mesfushori francez Aurélien Tchouaméni ka reaguar publikisht pas incidenteve të fundit në stërvitjen e Real Madrid, duke kërkuar falje ndaj klubit, tifozëve dhe bashkëlojtarëve.

Përmes një deklarate të gjatë, Tchouaméni e cilësoi atë që ndodhi gjatë javës në stërvitje si “të papranueshme”, duke theksuar se futbollistët duhet të japin shembull pozitiv për të rinjtë.

“Pavarësisht kush kishte të drejtë apo gabim, ne gjithmonë duhet të kërkojmë zgjidhjen më të qetë për të zgjidhur konfliktet”, deklaroi francezi.

Ai shprehu keqardhje edhe për imazhin që incidenti i ka dhënë klubit madrilen, duke pranuar se sezoni ka qenë zhgënjyes për të gjithë në klub.

“Më vjen keq për imazhin që kemi projektuar për klubin. E di që tifozët, stafi, bashkëlojtarët dhe drejtuesit janë të zhgënjyer nga mënyra si ka shkuar ky sezon. Por frustrimi nuk mund të justifikojë gjithçka”, u shpreh Tchouaméni.

Mesfushori shtoi se incidente të tilla nuk janë të denja për një klub si Real Madridi, duke kujtuar se bëhet fjalë për klubin më të komentuar në botë.

Ai gjithashtu konfirmoi se e pranon plotësisht dënimin e vendosur nga klubi dhe se tashmë fokusi i skuadrës është i përqendruar te ndeshja e madhe ndaj FC Barcelona në El Clásico dhe rikthimi i Real Madridit në majën e futbollit.

Sipas raportimeve, Tchouaméni do të jetë pjesë e skuadrës për përballjen e ardhshme në El Clásico, pavarësisht tensioneve të fundit brenda ekipit.

Flaka