Fetai: ASH është ende pjesë e Qeverisë – vetëm 3 zyrtarë kanë dhënë dorëheqje deri tani

Zëvendëskryeministri Arben Fetai deklaroi se Aleanca për Shqiptarët mbetet pjesë e Qeverisë së Maqedonisë së Veriut. Në një intervistë për emisionin Click Plus në TV21, Fetai tha se nga rreth 50 zyrtarë shtetërorë që përfaqësojnë ASH-në në poste qeveritare, vetëm 3 prej tyre kanë dhënë dorëheqje.

“Hisen e ASH-së në Qeveri e përbëjnë diku 50 zyrtarë shtetërorë të cilët janë emëruar në pozita të caktuara – së paku 50, ndoshta edhe më shumë. Deri tani, vetëm 3 prej tyre dihet që kanë dhënë dorëheqje publikisht. Të tjerët, nga ajo që unë kam dijeni, vazhdojnë të kryejnë detyrat e tyre në vendet e punës”, deklaroi Fetai.

Kjo deklaratë vjen në një kohë kur brenda Aleancës për Shqiptarët janë shtuar zërat për ndarje dhe pozicionime të reja politike. Flaka Media