Katër raste dhune të raportuara në Tetovë dhe Gostivar brenda 24 orëve

Tetovë/Gostivar, 21-22 maj 2025 – Gjatë ditës së djeshme dhe natës që pasoi, në rajonin e Pollogut janë shënuar disa raste të dhunës fizike dhe incidente në komunikacion, të cilat janë raportuar në stacionet përkatëse policore.

Më 21 maj 2025, në ora 09:40, në SPB Tetovë, I.Xh. (77) nga fshati Sellcë ka denoncuar se një natë më parë rreth orës 22:00, është sulmuar fizikisht para një objekti hotelierik në një qendër tregtare në Tetovë. Si autorë të dyshuar janë përmendur pronari i lokalit, J.T. (52) nga Trebosh, dhe T.I. nga Selca. Policia ka ndërmarrë masa për zbardhjen dhe dokumentimin e plotë të rastit.

Po atë ditë, në ora 17:30, N.O. (43) nga Reçica e Vogël ka raportuar në Stacionin Policor Tetovë se një ditë më parë, rreth orës 11:00, djali i saj i mitur është sulmuar fizikisht nga një shok klase, gjatë një turneu futbolli në oborrin e shkollës fillore ku mëson. Edhe ky rast është në fazë hetimi.

Ndërkohë në Gostivar, më 21 maj, në ora 20:30, Sh.M. (48) ka paraqitur kallëzim në DPB Gostivar, ku deklaron se rreth orës 16:00, në rrugën “JNA”, pas një debati verbal për çështje pronësore dhe juridike, është sulmuar fizikisht nga A.Sh., gjithashtu nga Gostivari. Po ndërmerren masa për zbardhjen e rastit.

Në orët e para të mëngjesit të 22 majit, në ora 01:10, në Stacionin Policor Tetovë, H.Z. (25) nga Tetova, i dënuar në Burgun e Tetovës, ka raportuar se është sulmuar fizikisht brenda institucionit nga N.M.. Autoritetet e burgut dhe policia janë duke punuar në sqarimin e incidentit.

Kontrolle në komunikacion

Gjatë ditës së 21 majit, në rajonin e SPB Tetovë janë realizuar kontrolle të intensifikuara në trafik. Janë sanksionuar 23 drejtues mjetesh për parkim të gabuar dhe të paligjshëm (Tetovë – 22, Gostivar – 1), ndërsa 15 automjete në Tetovë janë tërhequr me mjetin special “merimangë”. Gjithashtu janë evidentuar dhe ndëshkuar edhe 50 kundërvajtje të tjera në komunikacion (Tetovë – 27, Gostivar – 23).

Policia e Tetovës dhe Gostivarit bën thirrje për respektim të rregullave të rendit publik dhe të qarkullimit rrugor. Hetimet për të gjitha rastet janë në vijim. Flaka