Kaja Kallas: Integrimi evropian i Ballkanit, projekt kyç gjeopolitik i BE-së

Përfaqësuesja e lartë e Bashkimit Evropian, Kaja Kallas, ka përmbyllur vizitën e saj të dytë këtë javë në Ballkanin Perëndimor, duke theksuar rëndësinë strategjike të këtij rajoni për BE-në dhe duke e cilësuar zgjerimin e Bashkimit Evropian si projektin më të rëndësishëm gjeopolitik dhe prioritet personal.

Gjatë vizitave në Kosovë, Serbi dhe Maqedoninë e Veriut, Kallas dha mesazhe të qarta për përparimin në rrugën drejt integrimit evropian. Për Kosovën, ajo bëri thirrje për tejkalimin e ngërçit politik dhe formimin sa më shpejt të një qeverie funksionale, duke theksuar se “liderët duhet të lënë ndarjet anash dhe të vendosin në plan të parë të ardhmen e Kosovës”.

Sa i përket Maqedonisë së Veriut, Kallas nënvizoi rolin e rëndësishëm të vendit si i pari në rajon që nënshkroi Partneritetin për Siguri dhe Mbrojtje me BE-në, si dhe përfitimin nga Plani i Rritjes për Ballkanin Perëndimor. “Maqedonia e Veriut i përket familjes evropiane dhe tani është thelbësore të vazhdohet në rrugën drejt BE-së”, deklaroi ajo.

Vizita e Kallas reflekton angazhimin e vazhdueshëm të Bashkimit Evropian për avancimin e integrimit të Ballkanit Perëndimor në strukturat evropiane. Flaka Media