Tension dhe paqartësi në deklaratat e Azir Aliut: A ishte ai kanali i komunikimit mes Taravarit dhe Ahmetit? VIDEO

Në një konferencë për shtyp, Azir Aliu, ish-ministër për Shoqëri Informatike dhe ish-këshilltar i Nikolla Gruevskit, tashmë pjesë e grupimit kundër Arben Taravarit, u përball me një pyetje thelbësore: A ka qenë ai kanali i komunikimit mes Arben Taravarit dhe liderit të BDI-së, Ali Ahmeti?

Përgjigjja e tij nuk ishte as e qartë, as e qëndrueshme. Në vend që të japë një “po” ose “jo” të prerë, Aliu u duk dukshëm i tensionuar, nisi të djersitet dhe tregoi shenja të qarta shqetësimi përpara se të përgjigjej, shkruan Gostivari Sot

Fillimisht, pranoi se kishte pasur komunikime. Pak sekonda më vonë, tha se nuk kishte pasur. Dhe në fund, u shpreh se “të gjithë kanë komunikime varësisht nga rrethanat”. Kjo kontradiktë nxiti dyshime edhe më të mëdha, duke ngritur pyetjen:

Çfarë fshihet pas këtij hezitimi të Azir Aliut?

Ky zhvillim vjen në një kohë kur Aliu ka kaluar në krah të Arben Fetait, kundër liderit aktual të ASH-së, Arben Taravari – me arsyetimin se partia po afrohet me BDI-në. Ironikisht, pyetja e ngritur është nëse pikërisht Aliu ka qenë ndërmjetësi në komunikimet mes Taravarit dhe Ali Ahmetit në të kaluarën.

Në politikë, më e rëndësishme se fjalët janë qëndrimet e qëndrueshme dhe sinqeriteti ndaj publikut. E sot, mungesa e transparencës dhe tensioni në deklaratat e Azir Aliut lanë më shumë pikëpyetje sesa përgjigje. Gostivari Sot