BDI akuzon Mickoskin për gjuhë urrejtjeje dhe përjashtim të shqiptarëve

Në një deklaratë politike, Bashkimi Demokratik për Integrim (BDI) ka reaguar ndaj sjelljes dhe deklaratave të kryeministrit aktual Hristijan Mickoski, duke e akuzuar për dështime qeveritare dhe përdorim të gjuhës së urrejtjes si mjet të vetëm politik, transmeton Flaka

Sipas BDI-së, në mungesë të rezultateve konkrete, Mickoski dhe partia e tij kanë zgjedhur të përçajnë qytetarët përmes retorikës ndëretnike dhe përjashtimit të shqiptarëve nga diskursi shtetëror.

“Ndërsa Hristijan Mickoski vazhdon me britma, fyerje dhe provokime, qytetarët e shohin qartë se i vetmi ‘program’ që i ka mbetur përballë dështimeve, është urrejtja, përçmimi dhe përjashtimi i shqiptarëve,” thuhet në deklaratë.

“BDI ka ndërtuar progres, VMRO ka ndërtuar izolim”

Partia shqiptare kujton periudhën e 23 viteve në qeverisje si kohë kur vendi u anëtarësua në NATO, u afrua drejt BE-së dhe ndërtoi një model funksional të bashkëjetesës multietnike.

Nga ana tjetër, sipas deklaratës, VMRO-DPMNE e Mickoskit është identifikuar me “bllokada, izolim dhe korrupsion masiv”, duke u pozicionuar gjithmonë kundër çështjeve strategjike për vendin — që nga Marrëveshja e Ohrit e deri te integrimi euroatlantik.

“Sot, përveç kompasit strategjik, e kanë humbur edhe kompasin moral,” vijon më tej deklarata.

Tragjedia në Koçan dhe akuzat për ndërhyrje politike

Në reagim ndaj zhvillimeve të fundit rreth tragjedisë në Koçan, BDI akuzon pushtetin për mbrojtje të fajtorëve dhe presion ndaj familjeve të viktimave, duke e quajtur këtë një akt të ulët dhe të papranueshëm.

“Janë të gatshëm të ndjekin dhe frikësojnë prindërit e viktimave, vetëm për të shpëtuar fajtorët,” thuhet në reagim.

“Vasaliteti i ri” dhe paralajmërimi për zgjedhjet

Deklarata përmend edhe përfaqësuesit shqiptarë në qeverinë aktuale si “zëdhënës të turpshëm të vasalitetit”, duke paralajmëruar se shqiptarët do të dinë të mbrojnë dinjitetin e tyre përmes votës.

“Zgjedhjet e ardhshme janë referendum – mes një Maqedonie të izoluar, të përçarë dhe të korruptuar nga njëra anë, dhe një Maqedonie evropiane, të barabartë dhe të bashkuar nga ana tjetër.”

BDI e përfundon deklaratën duke konfirmuar pozicionin e saj si forcë që synon barazi, bashkim dhe përparim, dhe duke i bërë thirrje qytetarëve që të reagojnë me votë dhe vendosmëri kundër urrejtjes dhe përjashtimit. Flaka Media