2490 shkelje trafiku në vetëm tre ditë – MPB: Kontrollet do të vazhdojnë

Gjatë tre ditëve të fundit (14, 15 dhe 16 korrik 2025), policia ka evidentuar gjithsej 2.490 kundërvajtje në trafik në territorin e gjithë Maqedonisë së Veriut, si pjesë e kontrolleve të përforcuara në rrugë, transmeton Flaka. Sipas të dhënave të Ministrisë së Punëve të Brendshme, shumica e shkeljeve janë bazuar në Ligjin për sigurinë e komunikacionit rrugor, ndërsa një pjesë më e vogël në Ligjin për automjetet.

Shkeljet më të shpeshta: shpejtësia dhe parkimi i parregullt

Nga shifrat e publikuara:

• 513 drejtues janë dënuar për tejkalim të shpejtësisë së lejuar;
• 657 për parkim të parregullt;
• 251 persona janë larguar nga komunikacioni për mungesë të patentës së drejtimit.

Gjithashtu janë konstatuar:

• 89 shkelje për mosvendosje të rripit të sigurisë,
• 103 shkelje për përdorim të telefonit gjatë drejtimit të automjetit,
• 153 drejtues motorësh pa helmetë mbrojtëse.

Edhe këmbësorët nën kontroll – Dënohen 185 persona

MPB ka njoftuar gjithashtu për:

• 9 raste të kalimit me semafor të kuq,
• 185 kundërvajtje nga këmbësorët që nuk kanë respektuar rregullat e qarkullimit,
• 26 drejtues mjetesh të larguar nga komunikacioni për drejtim nën ndikim të alkoolit.

Përgjegjësi edhe për automjete të paregjistruara dhe teknikisht të papërshtatshme

Përveç kësaj, në bazë të Ligjit për automjetet, janë regjistruar:

• 12 kundërvajtje për automjete teknikisht të papërshtatshme,
• 56 për automjete të paregjistruara.

“Kontrollet në trafik do të vazhdojnë edhe në ditët në vijim. Apelojmë tek të gjithë pjesëmarrësit në trafik që të respektojnë rregullat dhe ligjet rrugore, në mënyrë që të kontribuojmë së bashku për rrugë më të sigurta.” – thuhet në njoftimin e Ministrisë së Punëve të Brendshme.

MPB bën thirrje për kujdes, vetëdije dhe respektim të rregullave, veçanërisht në sezonin e verës kur fluksi në rrugë është më i lartë dhe rreziku i aksidenteve rritet ndjeshëm.