Sekretet e lëkurës së shëndetshme sipas ekspertëve

Shkëlqimi dhe shëndeti i lëkurës nuk varen vetëm nga produktet kozmetike, por kryesisht nga mënyra e jetesës dhe zakonet e përditshme, sipas ekspertëve të mirëqenies.

Trajnerja Valérie Orsoni thekson se ushqyerja e balancuar dhe aktiviteti fizik i moderuar janë faktorë kyç për ruajtjen e elasticitetit dhe pamjes rinore të lëkurës.

Një rol të rëndësishëm luan dieta mesdhetare, e cila rekomandohet për shkak të përmbajtjes së lartë me antioksidantë, omega-3 dhe proteina cilësore. Frutat me ngjyra të forta si boronicat, mjedrat dhe manaferrat ndihmojnë në mbrojtjen e qelizave nga plakja e parakohshme, ndërsa peshqit si sardelet janë burim i mirë i yndyrnave të shëndetshme.

Ekspertët këshillojnë gjithashtu balancimin e proteinave dhe shmangien e luhatjeve të sheqerit në gjak, të cilat përshpejtojnë procesin e plakjes së lëkurës.

Aktiviteti fizik i rregullt, si ecja, noti apo vrapi i lehtë, përmirëson qarkullimin e gjakut dhe stimulon prodhimin e kolagjenit, duke ndihmuar në forcimin e lëkurës. Megjithatë, stërvitjet shumë intensive pa rikuperim mund të kenë efekt të kundërt.

Një tjetër element i rëndësishëm është menaxhimi i stresit dhe gjumi cilësor, ku teknika e frymëmarrjes së kontrolluar (koherenca kardiake) rekomandohet për uljen e stresit dhe përmirësimin e rikuperimit të trupit.

Së fundi, specialistët përmendin edhe drenazhin limfatik si një metodë që ndihmon në përmirësimin e qarkullimit dhe pamjes së lëkurës.

Në përgjithësi, ekspertët theksojnë se kombinimi i ushqimit të shëndetshëm, aktivitetit fizik, gjumit të mirë dhe menaxhimit të stresit është formula më efektive për një lëkurë të shëndetshme dhe rrezatuese.

Flaka