OBSH: Ja sa sheqer duhet të konsumojmë në ditë

Konsumimi i sheqerit mbetet një nga temat më të diskutuara në fushën e shëndetit publik, me studime të ndryshme nga Organizata Botërore e Shëndetësisë (OBSH/WHO), Agjencia Ndërkombëtare për Kërkimin e Kancerit (IARC) dhe revista të njohura shkencore që paralajmërojnë për efektet e konsumit të tepruar.

Sipas ekspertëve, sheqeri në vetvete nuk është i lidhur drejtpërdrejt me kancerin, por konsumi i tepërt i tij mund të kontribuojë në probleme serioze shëndetësore, sidomos kur shoqërohet me stil jetese të pashëndetshëm, si mungesa e aktivitetit fizik, dieta e dobët dhe konsumimi i duhanit apo alkoolit.

Një nga rreziqet kryesore të theksuara është obeziteti, i cili më pas rrit ndjeshëm rrezikun për diabet të tipit 2 dhe sëmundje kardiovaskulare. Sheqeri gjithashtu mund të krijojë një cikël varësie, pasi shkakton luhatje të shpejta të nivelit të glukozës në gjak, duke rritur dëshirën për konsum të mëtejshëm.

Sipas rekomandimeve të OBSH-së, konsumi ditor i sheqerit të shtuar nuk duhet të kalojë rreth 25 gramë në ditë për të rriturit, duke përfshirë edhe sheqernat “e fshehura” në produkte të ndryshme ushqimore si pijet e gazuara, ëmbëlsirat dhe salcat e ndryshme.

Ekspertët theksojnë gjithashtu se produktet “light” apo ëmbëlsuesit artificialë nuk janë gjithmonë alternativë e shëndetshme, pasi nuk e eliminojnë dëshirën për shije të ëmbël dhe mund të ndikojnë në rritjen e konsumit total të ushqimit.

Në përgjithësi, specialistët rekomandojnë një dietë të balancuar, me reduktim të sheqernave të shtuara dhe fokus në ushqime natyrale si frutat, drithërat dhe karbohidratet komplekse, për të ruajtur një shëndet sa më të mirë afatgjatë.

Flaka