Studimi: Sheqeri i tepërt mund të çojë në depresion

Konsumimi i tepërt i sheqerit nuk lidhet vetëm me mbipeshën, diabetin dhe sëmundjet e zemrës, por mund të ketë ndikim edhe në shëndetin mendor. Studime të fundit sugjerojnë se sasitë e larta të sheqerit në dietën e përditshme mund të rrisin ndjeshëm rrezikun e zhvillimit të depresionit dhe çrregullimeve të tjera të humorit.

Sipas të dhënave të publikuara nga studiuesit, personat që konsumojnë më shumë sheqer kanë deri në 23% më shumë gjasa të preken nga depresioni brenda pesë viteve të ardhshme, krahasuar me ata që mbajnë një regjim ushqimor më të balancuar.

Ekspertët theksojnë se një pjesë e madhe e sheqerit që marrim gjatë ditës vjen nga pijet e gazuara, ëmbëlsirat dhe ushqimet e përpunuara. Vetëm një pije e gazuar dhe një çokollatë e vogël mund të përmbajnë rreth 67 gramë sheqer, shumë më tepër se sasia e rekomanduar ditore prej 36 gramësh.

Përveç ndikimit në humor, teprimi me sheqerin mund të shkaktojë lodhje të vazhdueshme, mungesë energjie, trullosje pas ngrënies, probleme me lëkurën, shtim në peshë dhe rritje të rrezikut për diabet.

Mjekët këshillojnë kufizimin e konsumit të bukës së bardhë, ëmbëlsirave dhe ushqimeve të përpunuara, duke i zëvendësuar ato me produkte me drithëra të plota, fruta dhe perime. Gjithashtu, rekomandohet kontrollimi i etiketave të produkteve për të identifikuar sheqernat e fshehura që shpesh paraqiten me emra të ndryshëm si glukozë, dekstrozë ose shurup.

Specialistët nënvizojnë se nevojiten më shumë studime për të kuptuar plotësisht lidhjen mes sheqerit dhe shëndetit mendor, por paralajmërojnë se një dietë e ekuilibruar mbetet një nga mënyrat më të mira për të mbrojtur organizmin.

Flaka