Deri në 5 filxhanë kafe në ditë mund të jenë të sigurta për zemrën, sipas ekspertëve

Një rishikim i studimeve më të fundit nga Shoqata Amerikane e Zemrës (AHA) sugjeron se shumica e të rriturve mund të konsumojnë deri në pesë filxhanë kafe në ditë, ose rreth 400 mg kafeinë, pa rritur rrezikun për sëmundje kardiovaskulare.

Sipas ekspertëve, përfitimet lidhen kryesisht me kafenë e zezë, pa sheqer dhe pa shtesa të tjera, pasi sasi të mëdha sheqeri, shurupe aromatike dhe produkte qumështi mund të rrisin kaloritë dhe të ulin efektet pozitive të konsumimit të kafesë.

Megjithatë, studiuesit paralajmërojnë se këto rezultate nuk vlejnë për pijet energjike me përmbajtje të lartë kafeine. Konsumimi i tepërt i kafeinës mund të ndikojë negativisht në shëndetin e zemrës, duke rritur rrezikun për tension të lartë të gjakut dhe çrregullime të ritmit kardiak.

Nga ana tjetër, konsumimi i moderuar i kafesë pa sheqer është lidhur me një rrezik më të ulët për disa probleme shëndetësore, përfshirë diabetin e tipit 2, sëmundjet e zemrës, goditjen në tru dhe disa forma të aritmive.

Ekspertët theksojnë gjithashtu se kafetë e pafiltruara, si espresso, kafeja turke dhe French press, mund të përmbajnë përbërës që ndikojnë në rritjen e kolesterolit të keq (LDL).

Megjithatë, reagimi ndaj kafeinës ndryshon nga personi në person dhe varet nga mosha, gjendja shëndetësore, barnat që përdoren, faktorët gjenetikë dhe mënyra se si trupi e përpunon kafeinën.

Flaka