Stresi dhe ankthi nuk janë e njëjta gjë, ja si t’i dalloni

Stresi dhe ankthi janë dy gjendje që shpesh ngatërrohen me njëra-tjetrën, pasi mund të kenë simptoma të ngjashme, por në fakt bëhet fjalë për përvoja të ndryshme psikologjike.

Sipas Shoqatës Psikologjike Amerikane (APA), stresi lidhet me ndjenjën e të qenit i mbingarkuar, i shqetësuar ose i rraskapitur si pasojë e situatave të ndryshme të jetës, qofshin ato të mëdha apo të vogla.

Stresi është një reagim normal emocional ndaj sfidave dhe zakonisht largohet pasi situata që e ka shkaktuar përfundon. Megjithatë, pas ngjarjeve traumatike, disa persona mund të përjetojnë çrregullim akut të stresit, i cili mund të zgjasë deri në një muaj dhe të shfaqë simptoma të ngjashme me stresin post-traumatik.

Ndryshe nga stresi, ankthi konsiderohet një çështje më serioze e shëndetit mendor kur bëhet i vazhdueshëm dhe ndërhyn në jetën e përditshme. Personat me çrregullime ankthi mund të kenë shqetësime të përsëritura, frikëra të forta dhe të shmangin situata të caktuara.

Ankthi mund të shoqërohet edhe me simptoma fizike, si djersitje, dridhje, marramendje dhe rrahje të shpejta të zemrës.

Ekspertët theksojnë se, edhe pse stresi dhe ankthi mund të duken të ngjashëm, është e rëndësishme të kuptohet ndryshimi mes tyre, pasi menaxhimi dhe trajtimi mund të jenë të ndryshëm.

Flaka