LSDM: 5.53 milionë euro për koncertin e Guettës, Mickoski thotë se qytetarët nuk paguan asgjë

LSDM ka kritikuar kryeministrin Hristijan Mickoski për deklaratat e tij lidhur me koncertin e DJ-it të njohur botëror David Guetta në Shkup, duke e akuzuar për ekzagjerim të numrit të pjesëmarrësve dhe të suksesit të eventit.

Sipas opozitës maqedonase, ndërsa Guetta ka deklaruar se në koncert kanë qenë rreth 50 mijë fansa, Mickoski ka folur për mbi 200 mijë qytetarë.

LSDM ka ngritur pikëpyetje edhe mbi financimin e koncertit. Partia pretendon se organizimi ka kushtuar rreth 5.53 milionë euro dhe se financimi është bërë përmes Lotarisë Shtetërore.

Opozita kundërshton kështu deklaratën e Mickoskit se qytetarët nuk kanë paguar asnjë denar për koncertin. Sipas LSDM-së, pasi Lotaria është në pronësi shtetërore, të ardhurat e saj janë pjesë e pasurisë publike dhe, në këtë kuptim, paratë lidhen drejtpërdrejt me qytetarët.

Partia ka ngritur dyshime edhe për shpenzime të larta për skenën, organizimin dhe pjesëmarrësit në event, duke kërkuar më shumë transparencë rreth kostove.

LSDM paralajmëron se organizimi i ngjarjeve të tilla çdo vit mund të nënkuptojë shpenzime të tjera të konsiderueshme nga fondet publike.

Opozita e ka zgjeruar kritikën ndaj Mickoskit, duke e akuzuar se ekzagjeron shifrat edhe në fusha të tjera, përfshirë ekonominë, turizmin, trafikun ajror dhe pagat.

Pretendimet për numrin e pjesëmarrësve dhe koston e koncertit janë qëndrime të LSDM-së dhe nuk përbëjnë verifikim të pavarur të këtyre shifrave. Gazeta Flaka