“Qen mosmirënjohës”/ Zyrtari i kabinetit të Siljanovskës sulmon Mevlan Ademin për flamurin në Korab

Maja e Korabit është rikthyer në qendër të debatit publik pas vendosjes së flamurit kuqezi në pikën më të lartë të Shqipërisë, në lartësinë 2.764 metra.

Profesori universitar dhe aktivisti shqiptar, Mevlan Ademi, ka publikuar një fotografi nga maja e Korabit, ku shihet flamuri kuqezi, duke e shoqëruar me mesazhin:

“Ashtu siç i ka hije – Korabi, maja më e lartë e Shqipërisë.”

Postimi ka nxitur reagime, ndërsa një koment me gjuhë fyese ka ardhur nga Maksimilijan Kazakov, zyrtar në kabinetin e presidentes së Maqedonisë së Veriut, Gordana Siljanovska-Davkova.

Kazakov, në koment, ka shkruar në maqedonisht: “Prandaj edhe do të shkosh të jetosh atje, qen mosmirënjohës!”

Ademi i është përgjigjur duke theksuar përkatësinë e tij dhe duke kundërshtuar gjuhën e përdorur ndaj tij.

“Maksimilijan Kazakov, jetoj në tokën time, në vendin tim, falënderues vetëm për të gjithë dëshmorët e kombit tim!”, ka shkruar Ademi.

Flamuri kuqezi në Korab, debat prej një jave

Maja e Korabit është bërë temë debati publik gjatë ditëve të fundit. Flamuri kuqezi fillimisht ishte vendosur në majën e Korabit nga një grup i lëvizjes studentore të studentëve shqiptarë nga Shkupi dhe Tetova, në bashkëpunim me patriotë dibranë nga Maqellara.

Sipas informacioneve të bëra publike, në këtë çështje ishte përfshirë edhe ambasadori i Maqedonisë së Veriut në Kosovë, Denion Meidani, i cili kishte shprehur interesim për zhvillimet rreth flamurit.

Flamuri ishte hequr më pas nga pala maqedonase.

Megjithatë, dy ditë më parë, flamuri kuqezi është vendosur sërish në majën e Korabit, në lartësinë 2.764 metra.

Rikthimi i flamurit dhe reagimet që pasuan kanë rikthyer debatin mbi simbolikën kombëtare, identitetin dhe përdorimin e hapësirave kufitare e malore mes Maqedonisë së Veriut dhe Shqipërisë.

Në këtë kontekst, komenti fyes i një zyrtari të kabinetit presidencial ndaj Ademit ka shtuar edhe më shumë tensionin rreth kësaj çështjeje. Gazeta Flaka