Periudha më e nxehtë në Tokë, studim i ri!

Periudha më e nxehtë në Tokë ishte 400 mijë vjet më parë. Shkaku i kësaj faze të jashtëzakonshme klimatike të planetit mund të gjendet në ngrohjen e deteve, si edhe për shkak të një kombinimi kompleks faktorësh. Kjo është vërtetuar nga një studim i ri i publikuar në revistën “Nature Communications”, sipas të cilit gjatë kësaj periudhe të identifikuara si më e nxehta në Tokë në Evropë kishte para-Neandertalë, hemisfera veriore e Tokës kishte më pak akull se sot dhe niveli i detit ishte rreth 10 metra më i lartë. Bëhet fjalë për Paleolitin e Ulët në një epokë të quajtur MIS 11c.

“Kjo gjetje ka bërë të mundur rindërtimin e historisë mjedisore të Evropës Jugore nga 480 mijë deri në 360 mijë vjet më parë dhe zgjidhjen e një enigme që i ka shqetësuar studiuesit për një kohë të gjatë. Nxehtësia e Tokës 400 mijë vjet më parë nuk do të justifikohej nga nivelet e rrezatimit diellor dhe gazeve serrë”-shpjegon Universiteti i Pizës.

“Sot si atëherë rrezatimi diellor nuk ishte i fortë, por studimi ynë tregon se si ngrohja e zgjatur e oqeaneve vetëm mund të shkaktojë kolapsin e akullit dhe ngritjen e nivelit të detit pa kërkuar temperatura jashtëzakonisht të larta atmosferike ose përqendrime të gazeve serrë. Klima e kaluar është e një rëndësie të madhe për të kuptuar të ardhmen e planetit tonë dhe rolin që mund të kenë luajtur ndryshimet ekstreme klimatike në evolucionin njerëzor”-përfundon profesoresha e universitetit të Pizës, Elisabetta Starnini.

Ndërkaq, agjencia spanjolle e motit ka paralajmëruar se temperaturat mund të jenë më të larta se normalet deri në muajin tetor. Nuk ka fund vera e nxehtë në Evropë, pasi paralajmërimet për valë të nxehtit janë lëshuar nga Spanja në Gjermani. Thatësirat dhe zjarret kanë shpërthyer në të gjithë Mesdheun si pasojë e motit të nxehtë, i cili duket se do të vazhdojë gjatë gjithë gushtit dhe më tej në disa pjesë.

Nxehtësia ekstreme aktualisht merr më shumë se 175 mijë jetë çdo vit në Evropë, me shifra që do të rriten, sipas një raporti të publikuar sot nga Organizata Botërore e Shëndetësisë (OBSH). Paralajmërimet e verdha, portokalli dhe të kuqe për valë të nxehti janë lëshuar nga Agjencia Meteorologjike e Spanjës (AEMET) pasi temperaturat kërcënojnë të arrijnë 43 gradë Celsius në juglindje.