Skender Rexhepi-Zejd: Injoranca politike po cënon të drejtat gjuhësore të shqiptarëve

Deputeti Skender Rexhepi-Zejd ka reaguar ashpër ndaj qasjes së përfaqësuesve të VLEN-it në raport me çështjen e gjuhës shqipe në provimin e jurisprudencës, duke e cilësuar atë si shembull të “injorancës dhe demagogjisë politike”.

Në reagimin e tij, ai ka cituar Albert Einstein: “Dy gjëra janë të pafundme: gjithësia dhe injoranca – për të parën nuk jam i sigurt”, duke shtuar se kjo thënie reflekton mënyrën se si, sipas tij, po bëhet politikë nga VLEN-i.

Rexhepi-Zejd thekson se interpretimi i tyre për vendimin e Kuvendit të vitit 2019 është i gabuar, pasi ligji për provimin e jurisprudencës nuk e përcakton gjuhën e provimit – as maqedonisht dhe as shqip.

“Çështja e gjuhës rregullohet qartë me Ligjin për përdorimin e gjuhëve, konkretisht me nenin 23, i cili obligon harmonizimin e të gjitha ligjeve të tjera dhe përcakton se në rast mospërputhjeje zbatohet ky ligj,” deklaron ai.

Sipas tij, nga aspekti juridik nuk ekziston asnjë dilemë, ndërsa problemet lindin vetëm nga, siç thotë ai, “bashkimi i injorancës me servilizmin” te përfaqësuesit politikë.

Ai shton se moszbatimi i këtyre dispozitave nga qeveritë e kaluara nuk mund të përdoret si justifikim për qeverinë aktuale, veçanërisht në një kohë kur, sipas tij, studentët kanë ngritur kërkesa të qarta përmes peticioneve dhe protestave masive.

Rexhepi-Zejd përfundon se kjo situatë po zhvillohet në dëm të të drejtave të garantuara të shqiptarëve në vend. Gazeta Flaka