Real Madrid “ngec” për Carreras, Benfica e përfshin në turin amerikan

Real Madrid përballet me një tjetër pengesë në përpjekjet për të siguruar shërbimet e mbrojtësit Alvaro Carreras. Pavarësisht interesit të madh nga “Los Blancos”, Benfica ka reaguar duke përfshirë Carreras në skuadrën që do të udhëtojë për turneun në SHBA, një lëvizje taktike për të vonuar ose komplikuar çdo marrëveshje të mundshme.

Sipas raportimeve të Marca, klubi madrilen kishte shpresuar ta përfundonte marrëveshjen për 40 milionë euro, por Benfica qëndron e palëkundur në kërkesën për klauzolën e plotë të lirimit prej 50 milionë eurosh.

Xabi Alonso, i cili tashmë ka mbyllur transferimet e Dean Huijsen dhe Trent Alexander-Arnold për rreth 60 milionë euro, po kërkon ta kompletojë repartin e mbrojtjes me një emër të tretë – me Alvaro Carreras si synim kryesor për pas Kupës së Botës për Klube.

Presidenti i Benficas, Rui Costa, ka reaguar duke hedhur poshtë zërat për një marrëveshje të mbyllur me Real Madridin:
“Carreras do të luajë Kupën e Botës për Klube me ne dhe është lojtar i Benficas. Nuk kemi arritur asnjë marrëveshje me Real Madridin për të,” tha ai për Mundo Deportivo.
“Kishte oferta që nuk na pëlqyen, në rastin e Alvaros dhe për lojtarë të tjerë.”

Përplasjet mes dy klubeve janë intensifikuar, dhe edhe pse negociatat mbeten të hapura, duket se nuk do të ketë lëvizje përfundimtare përpara muajit korrik, kur Real Madrid mund të rikthehet me një ofertë të përmirësuar.

Flaka