Nuk je i/e martuar? – Tash, do paguash tatim shtesë nëse jeton në Maqedoninë e Veriut!

Kryeministri Hristijan Mickoski gjatë debatit qeveritar me temë “Trendet demografike, sfidat dhe zgjidhjet e mundshme – Zhvillimi i dokumenteve strategjike për rezistencë demografike”, bëri të ditur se qeveria po shqyrton mundësinë e vendosjes së tatimeve shtesë për personat e pamartuar, si pjesë e masave për të nxitur rritjen e natalitetit dhe për të përballuar zbrazjen e vazhdueshme të vendit, transmeton Flaka

“Këtu seriozisht mendojmë për vendosjen e tatimeve shtesë për të pamartuarit. Të nderuar, nuk ka asgjë më të shenjtë se jeta, dhe nuk ka asgjë më të trishtë nga ajo që sot shteti ynë ngadalë po zbrazet. Por gjithashtu, nuk ka asgjë më të guximshme sesa populli që zgjohet. Për këtë themi, koha është për të ardhmen, për shtetin ku do të lindin më tepër fëmijë”, deklaroi Mickoski.

Ai shtoi se rritja e numrit të martesave dhe e lindjeve do të jetë imperativ kombëtar, duke theksuar se qeveria po punon për të hartuar politika që do të forcojnë kohezionin familjar dhe do të inkurajojnë të rinjtë të ndërtojnë jetë të qëndrueshme në vend.

Kjo deklaratë ka ngjallur reagime të ndryshme në opinion, me një pjesë të publikut dhe ekspertëve që e shohin propozimin si ndërhyrje në të drejtat individuale, ndërsa të tjerë e konsiderojnë si përpjekje të dëshpëruar për të përballuar krizën e thellë demografike që po përjeton Maqedonia e Veriut. Flaka