“VLEN as nuk di, as nuk mundet” – Taravari godet ashpër qeverinë e Mickoskit

Kryetari i Aleancës për Shqiptarët, Arben Taravari, gjatë një takimi me aktivistë dhe mbështetës në Çegran, dërgoi mesazhe të qarta politike, duke e cilësuar situatën aktuale të shqiptarëve në Maqedoninë e Veriut si të papranueshme dhe margjinalizuese. Ai theksoi se zgjedhjet e tetorit nuk janë vetëm politike, por një referendum për dinjitetin shqiptar.

“Margjinalizimi i shqiptarëve është në një intensitet të përshpejtuar, dhe VLEN as nuk di e as nuk mundet ta ndalë këtë proces”, deklaroi Taravari para të pranishmëve.

Ai e cilësoi pozitën e shqiptarëve në qeverinë aktuale të udhëhequr nga Hristijan Mickoski dhe Maksim Dimitrievski si të mjerueshme, ku sipas tij, liderët e mbetur shqiptarë janë të heshtur dhe të nënshtruar, duke pranuar çdo kërkesë të partnerëve maqedonas, vetëm për të ruajtur vendin në qeveri.

“Kjo qeveri nuk është e shqiptarëve. Kjo është një qeveri ku shqiptarët janë të nënshtruar dhe të padukshëm. Ata heshtin, pranojnë gjithçka, dhe nuk përfaqësojnë askënd përveç interesit personal”, u shpreh Taravari.

Ai dërgoi edhe një mesazh të drejtpërdrejtë për VMRO-DPMNE-në, duke i kujtuar se shqiptarët nuk janë dhe nuk do të jenë kurrë të nënshtruar:

“Historia kurrë nuk i ka njohur shqiptarët si të nënshtruar dhe kurrë nuk do të pranojnë të nënshtrohen. Tetori është afër, dita e kësaj përgjigjeje po vjen”, theksoi ai me tone të vendosura.

Taravari përfundoi duke theksuar se Maqedonia nuk është shtet vetëm i maqedonasve, por edhe i shqiptarëve, dhe këtë e dëshmojnë breza të tërë që kanë dhënë gjithçka për një shtet të përbashkët dhe të drejtë.

“Zgjedhjet e tetorit janë referendum: a do të vazhdojmë të margjinalizohemi, apo do ta ndalim këtë padrejtësi historike? Ne zgjedhim dinjitetin, jo nënshtimin”, përfundoi Taravari në fjalimin e tij në Çegran. Flaka